Татарстан дулкынында (16.12.23)

Бүгенге чыгарылыш белән без ел дәвамында Татарстан радиосында барган “Безнең заман каһарманнары” дигән проектыбызны йомгаклыйбыз.

Әгәр исегездә булса, яңа тапшырулар циклын башлап җибәргәндә, без болай дип сөйләгән идек. Татар теле һәм әдәбиятына, татар халкы тарихына, милли тәрбиягә мәктәп программаларында урын бик аз бирелгән бер вакытта бу өлкәдә гаиләнең әһәмияте зурайганнан-зурая бара. Ләкин, ни кызганыч, соңгы елларда ата-аналарның — балалары белән, хәтта ак яулыклы, түбәтәйле әби-бабайларның оныклары белән татар телендә сөйләшмәүләре гаммәви күренешкә әверелеп килә. Шуның белән беррәттән без балаларына туган тел мохите тудыру, аларны татар телендә укыту, милли тәрбия бирү өчен биниһая зур тырышлык куйган үрнәк гаиләләрне дә еш очратабыз. Бүгенге көнебездә мондый эшләрне башкару үтә дә катлаулы, өстәмә чыгымнар, вакыт, сабырлык таләп итә. Шуңа күрә дә без бу кешеләрне чын мәгънәсендә “Безнең заман каһарманнары” дип әйтә алабыз, чөнки нәкъ менә алар —  милләтебезнең киләчәген тәэмин итүчеләр.

Тапшыруыбызның максаты — беренчедән, әнә шундый гаиләләрне алгы планга чыгару, башкаларга үрнәк итеп кую, аларны безнең заманның чын каһарманнары итеп күрсәтү. Икенчедән, шушы гаиләләргә, аларның батырлыгына һәм фидакарьлегенә карата җәмгыятьнең битараф булмавын, теләктәшлеген сиздерү.