Татарстан дулкынында (30.09.23)

Бүген игътибарыгызга “Фидакарьләр” проектының махсус чыгарылышын тәкъдим итәбез. Әлеге тапшыруны без ТР Рәисе каршындагы татар телен һәм Татарстанда яшәүче халыклар вәкилләренең туган телләрен саклау һәм үстерү мәсьәләләре комиссиясе ярдәме белән әзерлибез. Сез инде беләсез “Фидакарьләр” тапшыруының каһарманнары — гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар, остазлар, бакча тәрбиячеләре, тел галимнәре. Бүгенге тапшыруга әзерләнгәндә күренекле язучыбыз Мөхәммәт Мәһдиевнең: “Акыллы кеше белән сөйләшү – җан рәхәте”, — дигән канатлы гыйбарәсе хәтердә яңарды, чөнки студиябезнең кунагы – филология фәннәре кандидаты, Казан шәһәре “Адымнар” мәктәбенең татар теле һәм әдәбияты укытучысы Рамил Гомәр улы Ханнанов. Ул тумышы белән Әлмәт районы Чупай авылыннан. 2001 елдан алып 2006 елга кадәр Татар дәүләт гуманитар-педагогика университетының татар филологиясе факультетында белем ала. Аннан соң аспирантураны тәмамлап, 2009 елда кандидатлык диссертациясен яклый. Байтак еллар матбугатта эшләгәннән соң, 2020 елдан Казан шәһәре “Адымнар” мәктәбендә эшли башлый. Рамил Ханнанов – кырыктан артык фәнни-методик мәкалә, «Төрки драматургия контекстында татар сәхнә әдәбияты (ХIХ гасыр ахыры — ХХ йөз башы)» (2010) дигән монография, V — IХ сыйныфлар өчен татар әдәбияты дәреслекләре, укытучыларга тәгаенләнгән методик кулланмалар авторы. 2019 елдан Татарстан Язучылар берлеге әгъзасы.

Нашли опечатку? Выделите фрагмент и отправьте нажатием Ctrl+Enter