Татарстан дулкынында (16.09.23)

«Безнең заман каһарманнары».

Игътибарыгызга “Безнең заман каһарманнары” сәхифәсенең чираттагы чыгарылышын тәкъдим итәбез. Әлеге тапшыруны без ТР Рәисе каршындагы татар телен һәм Татарстанда яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән әзерлибез.

Соңгы елларда “Бабалары түгел, оныклары татар булган кеше – татар”, — дип әйтү популярлашып китте. Һичшиксез, телне, милли тәрбия һәм горурлык хисләрен буыннан буынга күчергән ата-ана, әби-бабай хөрмәткә лаек. Ләкин киләчәгебез – яшьләр, оныклар кулында. Һәр кеше гомер көзе якынлашкан саен, үз нәселенең дәвамы турында ешрак уйлана торгандыр. Ә менә кадерледән-кадерле, газиздән-газиз туган теленең язмышы, киләчәге турында күпләр уйлана микән? Оныкларың синең турында онытса, син калдырган рухи мирастан баш тартса, яшәвебезнең мәгънәсе ни чама икән?

Бүгенге тапшыруны әзерләгәндә минем күңелдә шундый уйлар бөтерелде.​ Ә тапшыруыбызның бүгенге каһарманнары белән без Яр Чаллы шәһәрендә очраштык. Аларның икесе дә гомерләрен автокалага багышлаган мөхтәрәм шәхесләр. Димәк без, физика-математика фәннәре докторы, профессор Назыйм Салих улы Габбасовларда кунакта. Аның хәләл җефете – Гөлнар ханым – 30 елдан артык Яр Чаллы шәһәренең 21 нче мәктәбендә татар теле һәм әдәбияты дәресләрен укыта. Төп йорт һәм аның җылысын ​ Габбасовларның балалары һәм оныклары һәрдаим тоеп яшиләр. Менә бит безне өй тулы оныклар, Гөлнар һәм Назыйм абыйның балалары каршы алды.

Нашли опечатку? Выделите фрагмент и отправьте нажатием Ctrl+Enter