Татарстан дулкынында (22.01.23)

Әдәбият сөюче тыңлаучыларыбыз өчен мөһим бер вакыйга бар – 17 гыйнвард Татарстанның халык язучысы, Татарстанның Габдулла Тукай һәм Россиянең Максим Горький исемендәге Дәүләт бүләкләре лауреаты, Татарстанның, Россиянең атказанган сәнгать эшлеклесе Аяз Гыйләҗевнең тууына 95 ел тулды.

Тапшырулар программасын төзегәндә бу араларда без әдипнең әсәрләренә гадәттәгедән ешрак мөрәҗәгать итәбез, эфирда аның проза һәм сәхнә өчен язылган әсәрләре яңгырый. Ә инде хәзер тыңлаучыларыбыз игътибарына без уникаль бер язма тәкъдим итәргә булдык. Бу – 1986 елда Аяз Гыйлаҗевка 60 яшь тулу уңаеннан әзерләнгән тапшыру. Әдип белән әңгәмәне ул вакытта әле радионың яшь хәбәрчесе Зиннур Хөснетдинов алып барган. Без аны хәзер танылган язучы, “Салават күпере” һәм “Сәхнә” журналларының баш мөхәррире, Татарстанның атказанган сәнгать эшлеклесе Зиннур Хөснияр буларак беләбез.

Әңгәмә тәмамланганнан соң, Тапшыруның икенче өлешендә әдәбият тәнкыйтьчесе Салих Маннаповның Аяз Гыйлаҗев иҗатына багышланган мәкаләсе Инсаф Абдулла укуында бирелә. Язучы биредә шул елларның иң актуаль мәсьәләләренә кагыла һәм, гаҗәп, аның күп кенә фикерләре нәкъ безнең көннәргә атап әйтелгән кебек тоела. Әйдәгез Аяз аганы тыңлыйк, рухына бер дога булып барсын!

Нашли опечатку? Выделите фрагмент и отправьте нажатием Ctrl+Enter