Татарстан дулкынында (18.07.2022)

Бу көннәрдә Татарстан Республикасының театр сәнгатендә зур югалту. Инде ишеткәнсездер, Татарстанның халык артисты, милли сәхнәбез осталарыннан берсе Юкачева Раушания Хөснетдин кызы дөнья куйды. Аның белән хушлашу бүген, Камал театры фойесында булды һәм ул туган авылы – Питрәч районы Күн авылында туганнары янына җиргә иңдерелде.
Юкачева Раушания Хөснетдин кызы 1959 елның 18 февралендә Татарстанның Питрәч районы Күн авылында туа. 1981 елда Казан театр учи­ли­ще­сын тә­мам­лый һәм Әл­мәт те­ат­ры­нда эшли башлый. 1983 ел­дан — Та­тар ака­де­мия те­ат­рын­да. Ул тамашачылар хәтеренә төр­ле сөй­кем­ле яшь ха­тын-кыз об­раз­ла­ры аша кереп калды. Театр белгечләре әйтүенчә, аларга йом­шак­лык, ли­ризм хас.
Кашшаф Әмировның “Зөлфия”сендә – Зөлфия, Туфан Миңнуллинның “Диләфрүзгә дүрт кияү”ендәге Саҗидә, Мансур Гыйләҗевнең “Бичура”сында – Руфия, Ркаил Зәйдулланың “Саташкан сандугач”ында – Мәрфуга шундыйлардан. Ә 90 нчы елгы балалар — безнең буын тамашачылар хәтеренә ул иң беренче чиратта Туфан Миңнуллинның “Авыл эте Акбай” спектаклендәге Тәмлетамак роле белән уелып калды. Бик яратып көтеп ала идек без бу спектакльне. Мансур Гыйләҗевнең “Казан егетләре”, “Тагын Казан егетләре”ндәге Фирдәвесе дә безне, телевизор экраннары аша булса да үзенә әсир итә иде.
Раушания ханым көчле лидерлык сыйфатларына ия актриса, хатын-кыз иде. Аны якыннан белгән хезмәттәшләре, сәхнәдәшләре дә кешелеклелек, мәрхәмәтлелек, башкаларны аңлый белү кебек сыйфатлары белән беррәттән шулай дип искә алалар.
Без кинәт арабыздан китеп барган Раушания Юкачеваның якыннарының, туганнарының тирән кайгысын уртаклашабыз һәм зур сабырлык телибез. Яраткан артисткабыз Раушания Юкачеваның рухы шат, урыны җәннәт түрләрендә булсын иде дип телибез. Бүгенге тапшыруыбызны аны искә алып, якты рухына багышлап әзерләдек. Хәзер без тыңлаячак тапшыру 2019 елда, Раушания ханым үзенең 60 яшьлеген бәйрәм итәргә әзерләнгән көннәрдә эфирга чыккан иде.

Нашли опечатку? Выделите фрагмент и отправьте нажатием Ctrl+Enter