Татарстан дулкынында (23.04.22)

“Фәнсөярләр клубы”. Тарих фәннәре кандидаты Айдар  Гайнетдинов белән әңгәмә. Икенче тапшыру.

Узган тапшыруларыбызның берсендә безнең студиядә кунакта филология фәннәре кандидаты, эпиграфист, әдәбиятчы, Ш.Мәрҗани исемендәге Тарих институтының фәнни хезмәткәре Айдар Марсель улы Гайнетдинов булган иде. Әңгәмәбездә сүз аның фәнгә беренче адымнары, остазлары, галим буларак формалаштырган факторлар турында барды. Шулай ук галим белән 16 нчы гасырга караган әдәби мирас үрнәге – Әднаш Хафизның “Сираҗел колүб” әсәре һәм аның кыйммәте турында да сөйләштек.

Айдар Гайнетдиновны хаклы рәвештә остазы – зур галимебез Марсель Әхмәтҗановның эшен дәвам итүче дип санарга хаклыбыз. Аның эзләнүләре, кызыксынулар өлкәсе шактый киң. Борынгы кабер ташларын өйрәнү шундый кирәкле һәм кызыклы юнәлешләрнең берсе. Галим Айдар Гайнетдинов әйтүенчә, республикабызда бүген 10 меңгә якын борынгы кабер ташы сакланган. Ни кызганыч, һәр елны төрле факторлар, табигый шартлар нәтиҗәсендә 10-15ләп таш юкка чыга бара.

Иң күп борынгы кабер ташлары сакланган район – Әтнә районы. Биредә 1567 берәмлек таш сакланып калган. Галимнең зур табышлары арасында Арча районының Ташкичү авылында Шиһабетдин Мәрҗанинең әти-әнисе һәм әби-бабасының кабер ташын табу була.

Айдар Гайнетдиновка шулай ук башкалабыз Казандагы борынгы зиратларда булып, кабер ташларын өйрәнергә туры килә. Кабер ташлары кешенең туу-үлү вакытын гына хәбәр итеп калмыйча, бу төбәктәге халыкның матди хәлен һәм рухи үсеш дәрәҗәсен дә күрсәтеп тора дигән иде Айдар Гайнетдинов. Әңгәмәбезне менә шул фикердән дәвам итик әле.

Нашли опечатку? Выделите фрагмент и отправьте нажатием Ctrl+Enter