Татарстан дулкынында (03.11.21)

Бу атнада халкыбызның мәшһүр композиторы, татар җыр сәнгатенә нигез салучыларның берсе, Татарстанның халык, Россиянең атказанган артисты, республикабызның Габдулла Тукай исемендәге дәүләт бүләге иясе, татарның беренче хатын-кыз композиторы Сара Садыйкованың тууына 115 ел тулуны билгеләп үтәбез.

«Халкын яраткан Сара Садыйкова үзенең үлемсез җырлары белән Салих Сәйдәшевтан соң музыкада үзе бер дәвер тотты». Күренекле композитор Ренат Еникеевнең әнә шундый сүзләре бар.

Сара Садыйкованың тормышы, иҗат юлы һәм язмышы бик гыйбрәтле.

Ул Салих Сәйдәшев киңәше белән, 1942 елда беренче тапкыр Ә.Ерикәй шигыренә «Көтәм сине» дип аталган тангосын яза. Шулай композиторлык эшчәнлеген башлап җибәрә. Үзенең иҗат гомерендә ул 400гә якын җыр, 30дан артык спектакльгә музыка, инструменталь әсәрләр яза, ике музыкаль комедия иҗат итә. Аның әсәрләре халык арасында киң популярлык казана.

Бүгенге көндә Сара Садыйкова иҗаты – татар музыкасының алтын фондын тәшкил итә, ә аның исеме милли тарихыбызның бер өлеше булып тора.

Нашли опечатку? Выделите фрагмент и отправьте нажатием Ctrl+Enter