Татарстан дулкынында (13.10.21)

Шушы көннәрдә Татарстанның халык артисты, халкыбызның яраткан җырчысы Искәндәр Биктаһиров 70 яшьлек юбилеен билгеләп үтте. Олы йөрәкле, туры сүзле, уйлаганын кистереп әйтә торган, бар гомерен халыкка хезмәт итүгә багышлаган, милли җанлы сәнгатъкәрләребезнең берсе ул. Җырчының репертуарында татар халык җырлары мөһим урын алып тора. Искәндәр Биктаһиров үз иҗатында, татар халык җырларының үзенчәлеген тирәннән аңлап, фольклор музыкасының бөтен нечкәлеген тоеп иҗат итә, аларны башкаруда яңа алымнар эзли. «Әллүки», «Зиләйлүк», «Туган тел», «Тәфтиләү», «Уйлану», «Хатлар язам» кебек күп кенә татар халык җырлары Биктаһиров башкаруында яңача яңгыраш алды, аеруча нык популярлык казанды.

Аның репертуары шулай ук классик композитор һәм шагыйрьләребез язган әсәрләргә дә бай. Шулай ук җырчы үзбәк, таҗик, казакъ, төрекмән, гарәп, шулай ук рус җырларын да башкара. Моннан тыш соңгы елларда ул үзе дә җырлар иҗат итә.

Җаннарны айкый торган моңы һәм яңгыравыклы тавышы белән инде бик күптәннән тамашачының йөрәген яулап алган җырчыбыз ничек, нинди уй-хыяллар белән яши, тормышында, иҗатында нинди яңалыклары бар? Бүген тапшыруыбызның кунагы – Искәндәр Биктаһиров белән сүзебез әнә шул хакта барыр.

Нашли опечатку? Выделите фрагмент и отправьте нажатием Ctrl+Enter