Татарстан дулкынында (25.09.2021)

ТР Президенты каршындагы татар телен саклау һәм үстерү комиссиясе ярдәме белән әзерләнеп эфирга чыга торган “Яшьлек сәхнәсе” проекты дәвам итә. Анда без сезне, хөрмәтле радиотыңлаучылар, республикабызның татар театрларында эшләүче яшь актерлар белән якыннарак, эре планда таныштырабыз. Аларның төп икмәге булган – татар теленә карата мөнәсәбәтләре, татар театры сәнгатенең киләчәге турында фикер алышабыз. Театрдагы мохит, актер хезмәтенең үзенчәлекләре турында сөйләшәбез.
Татарстандагы туган телләр һәм халыклар бердәмлеге елында мондый әңгәмәләр тагын да актуаль булып яңгырый, чөнки киләчәгебез – яшьләр кулында. Ә шушы заманда татар театры бусагасын атлап кергән яшь актерлар нинди максатларны күздә тота, нинди уйлар белән яши? Тарихтан мәгълүм, Казанда татар мәктәпләре ябылып, урамда, җәмәгать транспортында татарча сөйләшү кимегән совет елларында татар телен саклап калуда театр сәнгате зур роль уйный. Нәкъ менә театрга килеп, тамашачы җанга рәхәт саф татар сөйләмен ишетә, үзенең үткәне, бүгенгесе турында уйлана торган була. Ә бүгенге зур үзгәрешләр заманында яшәгән яшь актерлар үзләренә нинди зур миссия йөкләнгәне турында уйлыйлармы икән? Бу тапшырулар циклы шушы сорауларга җавап табу максатыннан барлыкка килде.
Бүген республикабызның Сабир Өметбаев исемендәге Минзәлә Татар Дәүләт драма театрының яшь, талантлы актерлары белән таныштыруыбызны дәвам иттерәбез. Тапшыруыбызның бүгенге чыгарылышында сезне. Хөрмәтле радиотыңлаучылар, яшь актер Илдар Халиков белән танышу көтә.

Нашли опечатку? Выделите фрагмент и отправьте нажатием Ctrl+Enter