Яшьлек аланы (08.09.2021)

Безгә ни сөйләшербез икән, дип баш катырасы юк, чөнки сезне дә, минем үземне дә кызыксындырган, борчыган уртак уйлар, уртак проблемалар байтак.
Спорт темасын алыйк. Беләм инде, сезнең арада спорт сөючеләр күп. Мин үзем дә спортка гашыйк кыз. Гомумән, безнең республикада сәламәт яшәү рәвешенә игьтибар бирүчеләр күбәя бара. Казан – Россиянең спорт башкаласы, дип юкка гына әйтмәгәннәр аны! Тик менә шунысы кызганыч: спорт белән шөгыльләнергә вакыт юк, акча юк, укудан арып кайткач, селкенәсе дә килми, дип зарланучылар да житәрлек безнең арабызда. Әмма болар бары сылтау гына. Күрегез әле, дуслар, башкалабызда “Безнең ишегалды” дигән президент программасы буенча никадәр ишегалды төзекләндерелде, аларның һәркайсында спорт мәйданчыклары булдырылды. Чык та, рәхәтләнеп шөгыльлән — моңа акча да, әллә ни озак вакыт та таләп ителми. Үз-үзеңне җиңеп, диваннан кубарылырга һәм смартфоныңны бер читкә куеп торырга гына кирәк. “Безнең ишегалды” дигән президент программасына һәм андагы спорт мәйданчыкларына без әле киләсе тапшыруларда урап кайтырбыз. Ә хәзер ары китик. Үз йортыбыз янында башланган шөгыль иртәме-соңмы сине фитнес-клубларга, спорт комплексларына алып киләчәк. Андый үзәкләр республикабызның шәһәр-районнарында күп. Казанны әйтеп тә торасы юк. Без бүген башкалабыз “Максимус” спорт клубында булырбыз. Киров районында урнашкан бу үзәк тирә-юньдә яшәүче яшьләрне үзенә тартып тора, яшүсмерләр арасында да популяр.
Инде серне дә ачыйм, дуслар: мин үзем дә шушында шөгыльләнәм. Шуңа күрә монда йөрүчеләрнең дә, тренерларның да күбесе миңа таныш. Инде менә сезне дә алар белән таныштырырга булдым.

Нашли опечатку? Выделите фрагмент и отправьте нажатием Ctrl+Enter