Татарстан дулкынында (18.08.2021)

Рөстәм Яхин иҗатының кыйммәте вакыт узган саен арта бара. Ул татар музыка тарихына һәм татар композиторлар мәктәбе үсешенә зур өлеш керткән шәхес. Үзенең иҗат дәверендә Рөстәм Яхин 400дән артык музыкаль әсәр иҗат итә. Ул – күренекле камера–вокаль һәм камера–инструменталь музыка остасы, татар җыры һәм романсын, милли–характерлы инструменталь миниатюра жанрларын яңа дәрәҗәгә күтәрүче. Камера-инструменталь иҗатында аның фортепиано өчен язылган әсәрләре аерым урын алып тора. Ул татар фортепиано осталыгы үсешенә көч куя, профессиональ белеме булган беренче татар композиторы һәм концертлар бирүче пианист була. Хәзер композиторның фортепиано әсәрләре – татар пианистлары репертуарының “алтын фондын” тәшкил итә.

Бүгенге көндә Р. Яхин иҗаты – татар милли классикасы, ә аның исеме исә милли тарихның бер өлеше булып тора.

Шушы зур дата уңаеннан бүген студиябезгә заманында күренекле композитор белән бергә эшләгән, бик күп еллар буе “Татарстан” радиосында хезмәт куйган, үзе дә бөтен гомерен музыкага багышлаган кеше , Татарстанның атказанган сәнгать эшлеклесе, концертмейстер Мөнирә Хәбибуллинаны чакырдык. Тапшыруыбызда Рөстәм Яхинның иҗатына да тукталып үтәрбез, шәхес буларак та ачарга тырышырбыз. Ә эфирыбызны Рөстәм Яхинның матур әсәрләре бизәр.

Нашли опечатку? Выделите фрагмент и отправьте нажатием Ctrl+Enter