Татарстан дулкынында (21.04.21)

Гомер – Китап! Ап-ак битләрендә

Узган юлың ята сузылып…

Сукмак-эзләреңә вакыт карый,

Мизгелләрен барлап, борылып.

Ничек узсаң, шулай языла ул –

Ким дә түгел, түгел артык та!

Ак чәчәкләр җыйган күңелләрдә

Ак хыяллар ята хаклыкта!..

Тапшыруымны шушы матур шигырь юллары белән башлап җибәрүем юкка гына түгел. Әлеге юлларның авторы, шагыйрә һәм күп кенә популяр җырлар авторы Мәрзия Сәлахова-Мухина бүген студиябезнең кунагы.

Бу исемне ишеткәч, күпләр бераз дулкынланып та куйгандыр. Чөнки данлыклы Мухиннар гаиләсен республикабызда кемнәр генә белми икән. Әйтик, танылган ревматолог Равия Мухинаны бү­ген, остазы кебек үк, “Ак чәчәк­ләр” романы каһар­маны – Гөлшаһидә дип йөртәләр. Ә биш бертуган кызның иң кечкенәсе Мәрзия Мухина-Сәлахова исә җырлары аша танылды.

Якташлары, филология фәннәре докторы, әдәбият галиме  Фоат Галимуллин да аларның гаиләсе турында бик җылы итеп искә ала. “Язмыш аларны туган җирлә­реннән китеп, чит төбәкләрдә йөрер­гә мәҗбүр иткән. Кайткач, авыл халкы аларны беренче күрүдә үк үз итә. Мухиннар да игелеккә җавап­сыз калмаган, ачык күңел­ләре, матур җырлары, яктылык сирпеп торган табигый елмаюлары белән халык­ның игътибарын җәлеп ит­кәннәр. Монда, әлбәттә, әти-әниләре Гаяз абый бе­лән Разия апаның роле зур”, – ди ул.

35 елдан артык ашыгыч ярдәм станциясендә югары категорияле шәфкать туташы булып хезмәт куйган Мәрзия ханымның тормыш юлы да нәкъ менә шушы шигырь юлларындагы кебек ак чәчәкләргә төренгән. Тормышын ничек бар шулай кабул итеп, һәркөнгә сөенеп, балкып яшәүче, язмыш сынаулары алдында сынмыйча-сыгылмыйча, татар хатын-кызларына хас булганча, көчле дә, шул ук вакытта нәзәкатьле һәм ягымлы да булып кала алган гүзәл ханымнарыбызның берсе ул.  Бер карасаң, иртә дими, кич дими, төн йокыларын калдырып, кешеләргә ярдәм итәргә ашыгу, иҗатка этәргеч була да алмас кебек иде. Әмма Мәрзия ханымның сүзләренә караганда, аның шигърияткә ныклап алынуы да шушы өлкәне сайлавыннан килә икән. “Табиб­лар кеше күз уңыннан яшеренеп калган мизгел­ләрне, киче­реш­ләрне күрә”, — ди ул.

Тормыш мәгънәсен, яшәү кыйммәтен чагылдыручы шигырьләре, җырлары белән инде күпләрнең күңелен яулап алырга өлгерсә дә, тыйнаклыгы, ихласлыгы белән үзен шагыйрь дип тә олыларга да ирек бирми. Мәрзия апаның йөрәк түреннән өзелеп төшкән әсәрләрен бүгенге көндә эстраданың энҗе бөртекләре саналган артистлары башкара.

Нашли опечатку? Выделите фрагмент и отправьте нажатием Ctrl+Enter