Татарстан дулкынында (06.12.20)

Шөкер, дип әйтик, заманыбызның гаять тә катлаулы булына карамастан, тормышыбыз күңелне сөендерә торган хәлләргә, вакыйгаларга бай. Тапшыруыбыз әнә шундый вакыйгаларның берничәсе турында булачак.

Менә, мәсәлән, әле генә Аксубайда Татарстан Дәүләт Советы рәисе урынбасары Марат Әхмәтов җитәкчелегендә туган телләрне саклау темасына бик тә әһәмиятле бер чара булып узды. Тапшыру барышында шушы вакыйга турында җентекләп сөйләрбез.

Бүген Татарстан радиосында күренекле язучыбыз Мөхәммәт Мәһдиев айлыгы йомгаклана. Без аны әдипнең тууына 90 ел тулу уңаеннан игълан иткән идек. Аның радио фондында сакланучы тавышын ишетербез.

Бүген шулай ук Татарстан радиосы дулкыннарында Сәйдәш музыкасы атналыгы да төгәлләнә. Эфирда атна дәвамында аның әсәрләре тынып тормады, аның иҗаты һәм тормыш юлы турында сөйләүче тапшырулар яңгырады. Сөекле композиторыбызның исемен хәтердә яңарту юнәлешендә Татар энциклопедиясе институты да гаҗәеп матур бер гамәл башкарды. Бу институт энциклопедиягә кергән мәкаләләрне видеоклип рәвешендә эшли башлады. Бүгенге көндә интернет челтәрләрендә утыручы халык Муса Җәлил, Бакый Урманче кебек бөек милләттәшләребез турындагы клипларны яратып карый. Һәм шундый популяр клипларның берсе Салих Сәйдәшевка багышланган. Шунысы да кызыклы: аларда институт директоры, күренекле тарихчыбыз Искәндәр Гыйлаҗев үзе сөйли.

Нашли опечатку? Выделите фрагмент и отправьте нажатием Ctrl+Enter