Татарстан дулкынында (25.11.20)

“Шәхес турында хәтерләүчеләр бар икән, димәк ул исән!” Халык телендә йөргән әлеге канатлы сүзләрнең хаклыгына, хикмәтенә ышаныр өчен ерак китәсе юк. Гомәр Мәрданов исемен ишетүгә үк Әтнә, Арча, Казан арты тирәсе кешеләренең күзләре янып, йөрәкләре җилкенеп китә торгандыр. Әтнә ягы гына түгел Казаныбызда, Татарстанда танып белүчеләр, хөрмәт итүчеләр дә бихисап. Әйе, бүгенге тапшыруыбыз Әтнә районының данын чит төбәкләргә, хәтта Мәскәүгә да таныткан, бөтен барлыгын яшәешен театрга багышлаган шәхес, Татарстанның атказанган мәдәният хезмәткәре, Марсель Сәлимҗанов исемендәге дәүләт премиясенең беренче лауреаты, күренекле режиссер һәм артист Гомәр Мәрдәнов хакында булыр.

Исән булса аңа, быел 90 яшь тулган булыр иде. Яраткан театрының 100 еллыгын бәйрәм итеп, үз язмышының бөек режиссеры булып бакыйлыкка күчкән Гомәр аганы әтнәлеләр яратып татар сәнгатенең Әлмәндәре дип атый. Ул куйган спектакльләрне һәркайсыбыз сагынып искә ала, һәркемнең, шәхсән үземнең дә аның белән бәйле хатирәләр, искә алып сөйләрдәй сүзләр күп. Күптән түгел Әтнә мәдәният йортында Гомәр аганың юбилеена багышланган зур гына кичә булып узды. Бүгенге тапшыруыбызда сөйләнәчәк якты истәлекләрне шушы кичәдән алынган өзекләр, Әтнә татар дәүләт драма театры артистларының чыгышлары белән бәйләп алып барырбыз.

Нашли опечатку? Выделите фрагмент и отправьте нажатием Ctrl+Enter