Татарстан дулкынында  (21.11.20)

Тапшыруыбызның бүгенге кунагы – сезгә, хөрмәтле радиотыңлаучылар, яхшы таныш шәхес. Ул күренекле актриса, Татарстанның халык, Россиянең атказанган артисты. Нибары 27 яшендә республикабызның Г.Тукай исемендәге Дәүләт премиясенә лаек булган шәхес  — Наилә Гәрәева бүген бездә кунакта.  

Татар театр сәнгате дөньясында аның йолдызы бик иртә, 20 яше дә тулмаган кыз чагында кабына. Наилә Хәким кызы Гәрәеваның 60 елдан артык гомере фидакарьләрчә сәнгатькә, Камал театрына багышланган. Бүгенге тапшыруда сүз аның иҗаты, башкарган рольләре һәм әлбәттә тормыш юлы турында.

Наилә Хәким кызы – Татарстан радиосының да якын дусты. Үзе әйтүенчә, аның һәр иртәсе безне тыңлап башлана. Шәхсән үзем эшләгән тапшыруларга да Наилә апа бик игътибарлы. Тапшыру бетүгә үк шалтыратып үз фикерен әйтә, рәхмәтләрен җиткерә. Автор өчен моннан да зуррак бәя булырга мөмкинме?! Сәхнә артында очратса да ул зур кайгыртучанлык күрсәтә, аналарча: “Әле син ашадыңмы? Ач йөри күрмә”, — диюе дә Наилә ханымның нинди киң күңелле булуы турында сөйли түгелме?!  

Билгеле, безне шулай якын иткән, һәр тапшыруны игътибар белән тыңлап барган шәхесне кунак итеп чакыру зур җаваплылык. Икенчедән, бу көннәрдә ул яраткан тамашачыларыннан, якыннарыннан котлаулар кабул итә. Наилә Хәким кызы  Гәрәевага – 80 яшь. Бу санны күпләр, бигрәк тә сәнгать кешеләре яшерергә тырышса, Наилә ханым киресенчә, бу яшькә җитү бик зур бәхет, сөенеп яшим, ничә яшь тулганын шатланып әйтәм ди.

Нашли опечатку? Выделите фрагмент и отправьте нажатием Ctrl+Enter