Татарстан дулкынында (11.11.20)

Кеше гомере кыска, ә иҗат мәңгелек дибез… Иҗат кешеләре арасында аз гына гомере эчендә атылган йолдыздай үз артыннан мәңге сүрелмәс якты эз калдырып китүчеләр байтак. Әнә шундый күренекле артистларыбызның берсе, киноактер, режиссер һәм педагог Шамил Бариевны кем генә белми икән! Кыска гына гомере эчендә татар театры тарихында һәм тамашачылар күңелендә тирән эз калдырган шәхеснең язмышы күпләр өчен әле дә табышмак булып кала бирә. Исән булса, быел 14 ноябрьдә Шамил Бариевка 70 яшь тулган булыр иде.

Ул 1950 елда Татарстанның Саба районы Олы Арташ авылында дөньяга килә. Явлаштау авылында урта мәктәпне тәмамлагач Ленинград театр, музыка һәм кино институтына укырга керә. Көндезләрен укып, кичләрен эшли торган була. Институтны кызыл дипломга тәмамлап Г.Камал  исемендәге театрга эшкә кайта. Озын буйлы, чибәр, өстәвенә гитарада оста уйнаучы, матур җырлый торган, талантлы егет тамашачыларның йөрәген бик тиз яулап ала. Театрда әйдәп баручы рольләрне уйный. Шул ук вакытта театр училищесында белем бирә, кинофильмнарга һәм телевизион спектакльләргә төшә. Соңрак Казан мәдәният һәс сәнгать институтында укыта.

“Ул ашкынып, ярсып, янып яшәде. 43 яшендә үк инде оста актер буларак танылып, үзе яшь артистлар тәрбияләүче, күпкырлы шәхес иде. Әмма күп кенә уйналмаган рольләре, эшлисе эшләре, җырланмаган җырлары калды,” – дип искә ала аны кызы Татарстанның атказанган артисты – Айгөл Бариева.

Айгөл бүген студиябезнең кунагы да. Аңлаганыгызча, бүгенге әңгәмәбез дә Татарстанның атказанган артисты, Муса Җәлил исемендәге премия лауреаты Шамил Бариев турында булыр.

Нашли опечатку? Выделите фрагмент и отправьте нажатием Ctrl+Enter