Татарстан дулкынында (14.10.20)

Тапшыруларыбызда гадәттә, язучылар, җырчылар, сәнгать әһелләре, аларның иҗаты хакында сөйләшсәк, бүгенгесе бераз үзенчәлеклерәк булыр. Әле күптән түгел генә республикабызның күренекле басмаларының берсе – “Шәһри Казан” газетасы үзенең 30 еллык юбилеен билгеләп үтте. Бүгенге тапшыруыбызны да нәкъ менә шушы мөһим вакыйгага багышларбыз.

Татар матбугатының гасырлар буена килгән традицияләре һәм бай тарихы бар. “Шәһри Казан” да шушы тарихның билгеле бер өлешен алып тора. Газетаның беренче саны 1990 елның 17 август көнендә басылып чыга. Октябрь аенда тулысынча көндәлек газета буларак чыга башлый. Шушы еллар эчендә газетада  башкалабыз, республикабыз тарихының төп вакыйгалары гына түгел, ә төрле чорларның рухы да чагылыш тапты. Биредә күренекле язучылар, шагыйрьләр, оста журналистлар эшләде.

90 елларда, милли күтәрелеш чорында гамәлгә кергән бу басма, вакытлар үтеп эчтәлегенә берникадәр үзгәреш керсә дә, 30 ел буена халкыбызга хезмәт итүче, милли мәнфәгатьләрне яклаучы, туган телебез, мәдәниятебез, әдәбиятебез, сәнгатебез, тарихыбыз, динебез сагында торучы газета булып кала бирә.

Нашли опечатку? Выделите фрагмент и отправьте нажатием Ctrl+Enter