«Татарстан дулкынында». 4 сентябрь.

Зөләйха Рәфыйк кызы Хәкимҗанова 1950 елның 30 нчы июнендә Әстерхан өлкәсе Нариман районы Осиный бугор авылында дөньяга килә. 1974 елдан ул вакытта күчмә, хәзерге Тинчурин труппасында.

Беренче мөстәкыйль роле — Гольдонинның «Ике хуҗаның хезмәтчесе» комедиясендә хезмәтче малай Джакомо. Соңрак, тәҗрибә туплап, ул хикмәтле, характерлы рольләрдә уңыш казана башлый. Уены эмоциональ, колоритлы. Рольләре арасында Туфан Миңнуллинның «Ак тәүбә, кара тәүбә» спектаклендә Алинә, «Сөяркә» спектаклендә Хәтимә, Аяз Гыйләҗевнең «Ефәк баулы былбыл кош» спектаклендә Шифан, Грекованың «Тол хатыннар көймәсе»ндә Аида, Гөлшат Зәйнашеваның «Гайфи бабай, өйлән давай!» спектаклендә картның кызы Наилә, «Хуҗа Насретдин»дә Сәхилә карчык һәм башка бик күп образлар бар.

Алга таба тапшыруыбызда артистканың тормышы һәм иҗаты турында башка фактларны үзеннән ишетербез, чөнки радиобыз фонотекасында Зөләйха Хәкимҗанова катнашында моннан берникадәр вакыт элек әзерләнгән тапшыру саклана. Аның авторы – журналист Нәсим Акмал. Бүген шул тапшырудан кайбер фрагментларны кабатлап тыңлыйк.

Нашли опечатку? Выделите фрагмент и отправьте нажатием Ctrl+Enter