«Татарстан дулкынында». 21 август.

Тапшыруыбызның бүгенге кунагы Татарстанның халык артисты Хәлим Бәдри улы Җәләлов күпкырлы шәхес — нәфис сүз остасы, әкиятче, шагыйрь. Әмма аның төп эше, яшәү мәгънәсе – сәхнә, театр. Хәлим абый сәнгатьнең бу төре белән беренче тапкыр Олы Солтан авылы сәхнәсендә таныша. Минзәлә театрының “Гаепсездән гаеплеләр” спектакле була ул. Мәктәптә укыганда нәфис сүз остасы Фәйзи Йосыповның сәхнәдән шигырь укуына мөкиббән китүен әйтә. Башкалабызга килгәч тә, үзешчән сәнгатьнең үзәгендә кайный Хәлим Җәләлов. Вахитов клубындагы хорда конферансье була, артист Һидият Солтанов куйган Җаббарлының “Ышанычлы Сария” спектаклендә катнаша. Шул вакытта ул үз урыны – сәхнәдә икәнен аңлый. Авыл хуҗалыгы институтының читтән торып 3 нче курсында белем алучы һәм “Татваленка” предприятиесендә эшләүче Хәлим Җәләлов тәвәккәлләп театр училищесына имтихан тапшыра. Имтиханга соңга калса да, профессор Ширияздан Сарымсаков, режиссер Рәфкать Бикчәнтәев, актер Шәүкәт Биктимеров егетнең талантын тиз белеп алалар. Әле театр училищесында укыган елларында ук Хәлим Җәләлов Камал театры спектакльләрендә катнаша. Мирсәй Әмирнең “Тормыш җыры”нда Каюм, Таҗи Гыйззәтнең “Чаткылар”ында Тимергали, Хәй Вахитның “Күк капусы ачылса”сында Гайфи рольләре Хәлим Җәләловның сәхнә тормышы биографиясендә якты эз калдырган. Курсташы Наил Әюпов шул вакытта “Җәләй бер аягы белән театрда инде ул”, — ди.

Нашли опечатку? Выделите фрагмент и отправьте нажатием Ctrl+Enter