«Татарстан дулкынында». 12 август.

Җыр – ул халыкның җаны, диләр. Бары үзенә генә хас җыр-моңнары, музыка уен-кораллары булмаган халык дөньяда юк. Татар халкының җыр хәзинәсе үзенә күрә бер тарих ул. Анда без ерак гасырлар тавышын да, бүгенге көннәр аһәңен дә ишетәбез. Җырларыбызда  милләтебезнең тел байлыгын, бүген дә кыйммәтен җуймаган проблемаларны, рухи матурлыкны тәрбияләүче сыйфатларны табарга була. Музыка сәнгате тел, милләт, тәрбия кебек төшенчәләр белән тыгыз бәйләнгән. Димәк бу –музыкантларыбыз һәм дә җырчыларыбыз җилкәсенә йөкләнгән зур җаваплылык та дигән сүз.

Ә бүгенге көн татар җырчысының иҗтимагый тормышта тоткан роле нидән гыйбарәт? Бүген татар җырчылары телне, милләтне саклауда үзләреннән нинди өлеш кертә ала? Сәнгатебезне тагын да үстерү,  популярлаштыру өчен нинди чаралар күрергә кирәк? Үткән атнада Татар- информ мәгьлүмат агентлыгында узган очрашуда Казан шәһәр филармониясе артистлары: Равил Харисов, Рөстәм Закиров, Резидә Шәрәфиева һәм Рөстәм Асаев белән нәкъ менә шулар хакында сөйләштек. Ул «Фатирник» ягъни заманча аулак өй форматында узды. Матбугат очрашуының беренче өлеше фикер алышу булса, соңыннан ул килгән кунакларның җырлары белән дәвам итте. Җырчылар – сәхнәне, залда утыручылар концерт-тамашаларны сагынган булгангамы, һәркайсыбыз рәхәтләнеп  җыр-моң дәрьясында йөзде.

Нашли опечатку? Выделите фрагмент и отправьте нажатием Ctrl+Enter