«Татарстан дулкынында». 7 август.

Тәслимә Хәләф кызы Фәйзуллина 1953 елның 17 июлендә Башкортстанның Бишбүләк районы Дүсән авылында дөньяга килә. 1972 елда Уфа сәнгать училищесын тәмамлап, Салават драма театры труппасына эшкә алына. 1977 елда Казанга күченеп килә, Республика күчмә театрында (хәзерге Тинчурин театрында) эшли башлый. 1997 елда Казан мәдәният һәм сәнгать академиясен тәмамлый. 2008 елда аңа театр сәнгате өлкәсендәге казанышлары өчен Татарстанның халык артисты дигән мактаулы исем бирелә. Тәслимә Хәләф театрда дистәләрчә еллар эшләү дәверендә 70ләп роль иҗат итә. Тамашачылар хәтеренә ул Шәриф Хөсәеновның “Әниемнең ак күлмәгендә” Гөлсем, Таҗи Гыйззәтнең “Ташкыннар” спектаклендә Гөлчирә, Лорканың “Өметсез хыяллар” спектаклендә Бернарда Альба, Нәбирә Гыйматдинова әсәре буенча куелган “Бер тамчы ярату” спектаклендәге Рабига рольләре белән кереп калды. Иң кызыклысы, бу әсәрләрнең кайберләренә үзе инсценировка яза.

 Ул шулай ук әдәби иҗат белән дә шөгыльләнә – пьесалар тәрҗемә, инсценировкалар эшли, моннан тыш популяр җырлар авторы да. Театрда эшләү белән беррәттән Тәслимә Хәләф Казан мәдәният һәм сәнгать университетында, соңрак театр училищесында актерлык осталыгы дәресләрен дә укыта. Студентларында ул театр сәнгатенә, татар мәдәниятенә һәм туган телгә мәхәббәт тәрбияли.