“Татарстан дулкынында”. 30 май.

Чын күңелдән җаныңны биреп эшләнгән эш кенә йөрәккә үтеп керә диләр. Бигрәк тә иҗат кешесенең көче нәкъ менә – ихласлыкта, дөньяны үзенчә нәфис төсләрдә күрүендә, ә күргәннәрен, садә күңеле аша үткәреп, гәүдәләндерә белүендәдер. Бүгенге тапшыруыбызның герое хакында да кемнән генә сорама, ул эчкерсез, гади, табигый иде, дип искә ала. Әйе, ихлас җырчыны гына халык чын күңелдән кабул итә. Сүзебезнең нәкъ менә шундый бәхетле җырчыларыбызның берсе, Татарстанның халык артисты Хәния Фәрхи турында баруын тыңлаучыларыбыз аңлап алгандыр инде.

Бүген яраткан артистыбыз Хәния Фәрхинең туган көне. Аңа быел нибары 60 яшь тулган булыр иде. Шул уңайдан, өч шәһәрдә – Казанда, Чаллыда, Уфада аның истәлегенә багышланган концертлар узарга тиеш иде. Тик үзегез беләсез, килеп туган катлаулы вәзгыять сәбәпле оештыручылар аны берникадәр вакытка кичектереп торырга мәҗбүр. Хәниянең концертларын көтеп алган тамашачы беләдер, ул ел саен диярлек туган көнен иң якын дуслары тамашачылары белән концерт куеп үткәрде. Соңгы концертында да нәкъ менә шушы көнне филармониядә “Истә калсын” исемле программа белән чыгыш ясаган иде. Аның: “Бу көн әле минем күңелләрдә озак сакланачак. Сезнең күңелләрдә бу көн истәлек булып калыр”, – дигән сүзләрен әле күпләр хәтерли. Ул чакта залда утырган тамашачы бу аның соңгы концерты дип уйлап та карамагандыр. Ни кызганыч, июль аенда яраткан артистыбызың арабыздан китүенә инде 3 ел була.

Җырчының якты истәлегенә багышлап эшләнгән тапшыруыбыз да аның рухына дога булып барсын иде.

Нашли опечатку? Выделите фрагмент и отправьте нажатием Ctrl+Enter