«Татарстан дулкынында». 8 май.

Бөек Җиңүгә 75 ел. Сугыш дәһшәте кагылмаган бер генә гаилә бар микән ул?! 75 ел үтсә дә, Бөек Ватан сугышы калдырган яралар бүген дә сыкрап, сыктап куя. Әмма бүген тарихны бозып күрсәтергә тырышкан ямьсез күренешләрне дә күзәтергә туры килә. Монысы тагын да яманрак, чөнки илебез азатлыгы өчен үзен аямыйча башларын салган әби-бабаларыбыз турында изгеләрдән изге саналган ХӘТЕР югала. Юкса, сугыш турында күпме китаплар, әсәрләр язылган, җан тетрәндергеч фильмнар төшерелгән, тере шаһитләр авызыннан ачы хакыйкать сөйләнгән… Һәр 9 май җитәр алдыннан болар кабат яңартыла. Сугыш китергән бәла-казалар башка яктан, үтә дә трагик итеп ачыла. Болар барысы да изге максатлардан эшләнә. Хәтер исән булсын! Алдагы буыннар сугыш афәтен күрмәсен, дөнья сәясәтчеләре 20 нче гасырда эшләгән хаталарын кабатламасын иде дип сөйләнә.

Бүген дә без студиябезгә хәтер барларга дип җыелдык. Байтак еллар Камал театрында труппа мөдире булып эшләгән Бикә Шакированы искә алыйк. Һәм бу юкка түгел, чөнки Бикә ханым сугыш юлларын үткән фронтовичка, сугыштан соңгы елларда Мамадыш, Камал театрында артистка булып та эшләгән. Аның турында безгә радиобызның якын дусты, Татарстанның атказанган сәнгать эшлеклесе Әхтәм ага Зарипов сөйли.

Нашли опечатку? Выделите фрагмент и отправьте нажатием Ctrl+Enter