«Татарстан дулкынында». 25 март.

Узган атнада Татарстан Фәннәр академиясендә татар җыры сәнгатенә багышланган халыкара фәнни-гамәли конференция булды. Аны Рәшит Ваһапов исемендәге Халыкара татар җыры фестивале оештырды. Биредә татар җыр сәнгатенең тарихи баскычлары, татар эстрадасының бүгенге торышы һәм үсеш юллары турында фикер алыштылар. Конференция программасына 29 чыгыш кертелгән иде.

Чыннан да, эстрада турында еш сөйләшәбез, тәнкыйтьләргә яратабыз. Әмма монысы галимнәр, музыка белгечләре һәм профессиональ җырчыларыбыз катнашында беренче тапкыр зурдан кубып сөйләү иде. Татар сәнгатенең зур бер өлешен алып торган эстрада юнәлеше әле бөтенләй өйрәнелмәгән диярлек. Ә бит уйлап карасак, җыр татар халкын саклап торучы көчле бер корал! Ә бүгенге татар эстрадасы үзенең шушы халәтенә җавап бирәме? Җырчы тамашачыны ияртәме, әллә инде тамашачы җырчы зәвыгына иярергә тиешме? Бу өлкәдә нинди проблемалар бар, аларны ничек хәл итәргә? Әлеге конференциядә сүз башлыча менә шул хакта булды. Тапшыруыбызда Р. Ваһапов фестивалендә без әнә шул турыда сөйләшербез, кайбер чыгышларны тыңларбыз.

Нашли опечатку? Выделите фрагмент и отправьте нажатием Ctrl+Enter