“Татарстан дулкынында”. 15 март.

Сезгә мәгълүм: шушы елнаң май аенда без Татарстан автономияле совет социалистик республикасы оешуның 100 еллыгын билгеләп үтәчәкбез. Әлеге олы датаны каршылап, узган ел Татарстан радиосы республикабызның үткән юлына һәм бүгенге көненә багышланган тапшырулар шәлкемен башлап җибәргән иде. Бүген без менә шул тапшырулар арасында тагын бер яңа сәхифә ачабыз. Бу сәхифәдә татар халкының һәм республикабызның үткәнен өйрәнүче галимнәр, дәүләт һәм җәмәгатъ эшлеклеләре, язучылар, журналистлар катнашыр дип көтелә. Сез үзегез дә, хөрмәтле тыңлаучылар, читтә калмассыз, дип өмет итүбез. Ә инде теманы әйдәп баручы, безгә юнәлеш биреп торучы кеше академик Индус Таһиров булачак. Бу эшебезне без бүген нәкъ менә Индус аганың “Ил корабын җил сөрә” дигән язмасы белән башлап җибәрәчәкбез. Юкка гына түгел, чөнки бу мәкаләдә республика оешуның алшартлары да, күпмедер дәрәҗәдә аның тарихы да, бүгенге көне дә чагылыш таба.

“Бөек җиңүгә 75 ел!” дип исемләнгән сәхифәдә тыңлаучы игътибарына каһарман шагыйребез Фатыйх Кәримнең “Партизан хатыны” дигән балладасы тәкъдим ителә. Аны Әлфия Хәбибуллина укый.

Нашли опечатку? Выделите фрагмент и отправьте нажатием Ctrl+Enter