“Татарстан дулкынында”. 1 март.

Бөек җиңүнең 75 еллыгын каршыларга әзерләнәбез. Бу көннәрдә Татарстан радиосында шушы җиңүне якынайту өчен үзләрен корбан иткән якташларыбыз, батырлыклар күрсәткән милләттәшләребез, фронтка киткән ирләренең бөтен эшен үз иңнәрендә күтәргән хатын-кызларыбыз, балачакларын сугыш уты көйдергән сугыш чоры балалары турында материаллар туплана, тыңлаучыларыбыз игътибарына тәкъдим ителә. Менә шундый иҗатлы-иҗтиһадлы бер көндә редакциядә телефон шылтырады. Һәм менә бүгенге тапшыруның дөньяга яралу тарихы шул мизгелдән башланып китте. Татарстанның халык шагыйре, республикабызның Габдулла Тукай исемендәге дәүләт премиясе һәм Россиянең дәүләт премиясе лауреаты Ренат Харис шалтыратты безгә. Дулкынланып шалтыратты. Чыннан да аның иҗатында дулкынландыргыч бер сәхифә иде бу. Ул әле генә күләмле шигъри әсәрен – “Төрек валы” дип исемләнгән поэмасын язып төгәлләгән һәм аны иң беренче булып Татарстан радиосы тыңлаучылары хөкеменә чыгарырга булган. Аңлагансыздыр, хөрмәтле тыңлаучылар, бүген бездә премьера. Ренат Харис үзенең яңа поэмасын тәкъдим итә.

Нашли опечатку? Выделите фрагмент и отправьте нажатием Ctrl+Enter