«Татарстан дулкынында». 28 февраль.

Бүгенге тапшыруыбызга кереш итеп без халык шагыйре Әнгам Атнабаевның шигырен хәтердә яңартырга булдык.  

Талантларның язмышлары авыр…

Чөнки алар гайре табигый,

Дөнья балалары арасында

Я дивана сыман, я үги.

Туры булсаң, нигә кәкре диләр,

Кәкере булсаң, нигә төз түгел ?

Нигә инде мөгез чыгарасың,

Нигә безнең кебек, без түгел ?

Талантларның күңелләре нечкә,

Сындырып та була кимереп.

Сыйдырып та була бүгенгенең

Калыбына туры китереп.

Ахыр чиктә, үтереп тә була…

Тик терелтеп булмый кабаттан…

Талантларга зинһар кагылмагыз,

Үзләренчә булсын талантлар !

Әнгам Атнабайның бу шигъри юллары әйтерсең лә бүгенге тапшыруыбызның баш каһарманы – талантлы актер, режиссер республикабызның Г.Тукай исемендәге премия лауреаты Рәфкать Бикчәнтәевне күздә тотып язылган. Рәфкать Бикчәнтәевне искә алып әзерләнгән тапшыруыбызда аның якын кешеләре, шәкертләре һәм сәхнәдәшләре катнаша.