«Татарстан дулкынында». 5 февраль.

Тапшыруыбызны танылган язучы Гомәр Бәшировның сүзләре белән башлап җибәрәсем килә. “Кешенең рухи дөньясына, күңел байлыгына килгәндә, матур әдәбият һәм сәнгать, фән кереп җитә алмастай, ифрат тирән, ифрат нечкә нюансларны да ачып бирергә сәләтле!”, – дип яза ул. Әйе, әдибебезгә өстәп тагын, матур әдәбият һәм югары сәнгать әсәрләре кешенең күңел дөньясын баетып кына калмый, ә киләчәктә тагын да камилләшүгә, зур үсешләргә дә юл ача дип әйтәсе килә. Бүгенге тапшыруыбызда да без нәкъ менә шулар хакында сөйләшербез. Студиябезнең кунагын да гадәттәгечә иҗат кешесе дип түгел, ә төгәл фәннәр аша иҗатка килгән кеше дип таныштырасым килә. Ул бүген күпләргә таныш “Әдәби марафон”, “Сәләмәт иртә” “Тәмле марафон” кебек проектларның авторы, «Татнетны үстерү фонды” директоры, «Белем.ру» оешмасы җитәкчесе – Раил Гатауллин.

Кунагыбыз белән бераз таныштырып та үтим. Раил Казан дәүләт педагогика университетында физика һәм информатика укытучысы белгечлеге буенча югары белем алгач, туган ягы Кукмара районы Мәмәшир авылына кайтып укытучы булып эшли. Соңрак аспирантура тәмамлый һәм студентларга белем бирә. Казан шәһәренең 5 нче татар гимназиясендә укыткан елларында да укучылар белән актив иҗат эше алып бара. Авиатөзелеш районы мәгариф идарәсе, Татарстан Мәгариф һәм фән министрлыкларында эшләгәндә мәктәпләрне интернетлы итү буенча тырышлык куя. Соңгы елларда без аны язучылар берлеге рәисе урынбасары буларак та беләбез.

Нашли опечатку? Выделите фрагмент и отправьте нажатием Ctrl+Enter