7 көн (03.08.24)

Атналык күзәтү.

Россия Президенты Владимир Путин махсус хәрби операция зонасында хезмәт итү өчен илнең оборона министрлыгы белән контракт төзегән хәрбиләргә, 1 августтан 31 декабрьгә кадәр, 400 мең сум күләмендә бер тапкыр акча түләү турындагы указны имзалады. Татарстанда Россия оборона министрлыгы белән контракт төзегән гражданнар 1 миллион 705 мең сумга кадәр акча алачак.

2023 елның 21 декабрендә ачылган М12 «Восток» түләүле юлы буенча сәфәрләр саны 15 миллионга җиткән. Бу хакта Россия вице-премьеры Марат Хөснуллин  хәбәр итте.

Татарстан рәисе Рөстәм Миңнеханов Форостагы «Сәләт-Ак Барс» лагеренда булып, балаларның ялын оештыру шартларын тикшерде. Хәзер лагерьда профильле сменаларда Татарстаннан 237, Кырым Республикасыннан 60 бала ял итә.

Татарстан Үзәк сайлау комиссиясенең 61 нче утырышында җиденче чакырылыш Дәүләт Советына депутатлар сайлау бюллетеньнәренең формасы расланды. Бюллетеньнәр татар һәм рус телләрендә бастырыла.

Быел Татарстанда Бердәм Дәүләт имтиханнары барышында 342 чыгарылыш сыйныф укучысы берәр фәнне 100 баллга тапшырган.  Мәгариф һәм фән министры Илсур Һадиуллин Казан, Чаллы, Түбән Кама, Әлмәт, Зеленодольск, Бөгелмә, Лениногорск һәм Чистай муниципаль районнары укучыларының уңышларын аерым билгеләп үтте.

Башкортстанның Илеш районы Шәммәт авылында халык шагыйре Роберт Миңнуллинның мемориаль музее ачылырга әзерләнә. Музей Башкортстан һәм Татарстан Хөкүмәтләре ярдәме белән төзелгән.

Нашли опечатку? Выделите фрагмент и отправьте нажатием Ctrl+Enter