7 көн (27.07.24)

Атналык күзәтү.

Икмәк өчен көрәш кыза. Республикада урак дәвам итә. Буа, Әлки һәм Тәтеш районнары иң күп мәйданда уңыш җыйды, ә Тәтеш районында һәр гектардан иң күп уңыш чыга.

Татарстан рәисе Рөстәм Миңнеханов Иран Ислам Республикасы Конституциясен яклау Советы һәм экспертлар Советы җитәкчесе  Алиреза Арафи, шулай ук Сенегалның Sifi (СИФИ) компанияләр төркеме президенты Абдеррахман Ндиае белән очрашты.

Татарстанда өч сәяси партиянең төбәк бүлекләре тарафыннан күрсәтелгән Дәүләт Советына депутатлыкка кандидатларның исемлекләре теркәлде. Республика Үзәк сайлау комиссиясе утырышында шул хакта карар кабул ителде.

Казанда «Рухи Ефәк юлы: Зур Евразия киңлегендә дини кыйммәтләрнең әһәмияте» дигән V Халыкара фәнни-дини конференциясе узды. Ул Татарстан Республикасы ярдәме белән Россия Федерациясе мөселманнары Диния нәзарәте, Россия Мөфтиләр шурасы һәм Мөхәммәт бин Зәйд исемендәге гуманитар фәннәр университеты тарафыннан оештырылды.

Бүген Балтач районы Бөрбаш Сәрдегәне авылында бишенче тапкыр Чишмә көне – «Нурзидә» бәйрәме уза. Әлеге күркәм бәйрәмдә татар җәмәгатьчелеге, дин һәм иҗат әһелләре, Бөтендөнья татар конгрессы вәкилләре катнаша.

Нашли опечатку? Выделите фрагмент и отправьте нажатием Ctrl+Enter