Яңалыклар (20.05.24)

Иртәнге чыгарылыш.

Татарстан башкаласында 14 майдан 19 майга кадәр үткәрелгән «Россия-Ислам дөньясы: KazanForum» 15 нче халыкара икътисадый форумы үз эшен тәмамлады. Татарстан Республикасы Хөкүмәте Йортында үткән киңәшмәдә әлеге чарага нәтиҗә ясап, Татарстан Рәисе Рөстәм Миңнеханов аның югары дәрәҗәдә узганлыгын әйтте.
Халыкара икътисадый форум кысаларында республикабызда XIV Бөтенроссия татар дин әһелләре форумы да оештырылды. Аның делегатлары кичә борынгы Болгар шәһәрендә ел саен үткәрелә торган «Болгар җыены»нда катнашты.

Кичке чыгарылыш.

Татарстан Рәисе Рөстәм Миңнеханов Иран Ислам Республикасы Президенты Ибраһим Рәисинең фаҗигалы төстә гомере өзелү сәбәпле, кайгы уртаклашты.

Татарстан Рәисе Рөстәм Миңнеханов төркмән халкы лидеры Гурбангулы Бердымухамедов белән “Россия-Ислам дөньясы” форумы йомгаклары турында телефоннан сөйләшкән. Төркмәнстан Халык Мәсләхәте рәисе делегацияне җылы кабул иткән өчен. Татарстан җитәкчелегенә рәхмәт белдергән, форум йомгакларын югары бәяләгән.

Татарстан Дәүләт Советы Рәисе Фәрит Мөхәммәтшин республикада яшәүчеләрне “Бердәм Россия” партиясенең тавыш бирү чарасында катнашырга чакырды. Бу хакта ул Апаста зона киңәшмәсендә белдерде. Тавыш бирү нәтиҗәләре депутатлыкка кандидатларның ышаныч дәрәҗәсен ачыкларга мөмкинлек бирәчәк.

Нашли опечатку? Выделите фрагмент и отправьте нажатием Ctrl+Enter