Фидакарьләр (20.02.24)

Бүген бездә зур вакыйга – күп тыңлаучыларыбыз яратып тыңлаган “Фидакарьләр” тапшыруы кабат эфирда.

Тапшыруыбызның беренче сезонында без сезне республикабыз мәктәпләрендә эшләүче гомерләрен татар теле һәм әдәбиятын, башка фәннәрне татар телендә укытуга багышлаган укытучылар, яшь педагоглар һәм бакча тәрбиячеләре белән таныштырдык. Быел да алар татар телен укытуда яңа тәҗрибә һәм алымнар белән уртаклашуларын дәвам итәчәк. Алга таба кайбер чыгарылышлар чын дәрес форматында булачак. Тапшыруны сез гадәттәгечә сишәмбе һәм җомга көннәрендә 15 сәгать 25 минутта тыңлый аласыз.

Бүгенге тапшыруыбызны без Халыкара туган телләр көненә багышлап республикабызның иң ерак районнарының берсенән әзерләдек. Күптән түгел генә Әгерҗе районының Кырынды авылында булып кайттык. Әлеге авылда руслар татарларга караганда татарча яхшырак сөйләшә! Әлбәттә, бу беренче карашка бик сәер яңгырыйдыр. Моның хаклыгына безнең тапшыруларны тыңлагач инанырсыз әле.

Кырынды авылында элек-электән төрле милләт вәкилләре – татарлар, руслар, удмуртлар бердәм, дус-тату булып яшиләр. Бик борынгыдан нигез итеп алынган традицияләр бүген дә дәвам итә.

Нашли опечатку? Выделите фрагмент и отправьте нажатием Ctrl+Enter