Фидакарьләр (15.12.23)

Бүген сезне бик тә кызыклы һәм уникаль шәхес белән танышу көтә. Ул үзе хәзерге вакытта Япониядә яши һәм үзенең туган теле булган япон теленнән кала – татар, башкорт, чуваш, төрек, таҗик, инглиз һәм башка бик күп телләрне белә, чын полиглот, үзенә күрә феномен. Сүзем – Юто Хишияма турында.

Әйе, әлеге исем милләттәшләребез арасында шактый таныш. Япониядә яшәүче әлеге егет 2014 елда Татар теленнән халыкара олимпиадада җиңү яулый һәм күпләрдә зур соклану уята. Үз татарларыбыз да туган телләрен өйрәнүдән читләшкән бер заманда, япон кешесенең үзлегеннән татар телен өйрәнүе һәм татарлар  белән кызыксынуы, ә аннан соң туган иленә кайтып Япон телендә татар теленә өйрәтә торган беренче дәреслек язуы – зур тырышлык һәм чын мәгънәсендә фидакарьлек үрнәге.

Ел буе дәвам иткән, “Фидакарьләр” дип исемләнгән проектыбызның йомгаклау чыгарылышында без Сезне, хөрмәтле радиотыңлаучылар, Юто Хишияма белән якыннанрак таныштырырга булдык һәм аның үзе белән интернет аша элемтәгә чыктык.