Яңалыклар (23.11.23)

Иртәнге чыгарылыш.

Татарстан Дәүләт Советы Рәисе, “Бердәм Россия” партиясенең республика төбәк бүлеге секретаре Фәрит Мөхәммәтшин гражданнарны кабул итте. Республикада яшәүчеләр аңа төзекләндерү, бистә юлларын ремонтлау, урамнарны яктырту мәсьәләләре буенча мөрәҗәгать итте.
Санкт-Петербургта төбәк һәм дөнья туристик маршрутларына мәдәни, табигый мирас объектларын, ял итү, күңел ачу, мәдәният һәм спортны оештыру эшчәнлеге төбәкләрен җәлеп итүгә багышланган халыкара конференция булды. Татарстанның Санкт-Петербургтагы һәм Ленинград өлкәсендәге даими вәкиле Ринат Вәлиуллин «Милли туристлык маршрутларында Татарстанның милли аш-сулары мөмкинлекләре»н тәкъдим итте.
Иң яхшы балалар әдәби әсәрләренә Роберт Миңнуллин исемендәге конкурс йомгаклары бүген күренекле шагыйрьнең тууына 75 ел тулуга багышланган кичәдә игълан ителәчәк. Кичә Татар дәүләт филармониясе залында була.

Көндезге чыгарылыш.

Бу минутларда алтынчы чакырылыш Татарстан Дәүләт Советының 49 утырышы бара.  Көн тәртибендәге төп мәсьәлә – республиканың 2024 елга һәм 2025-2026 еллардагы план чорына бюджет турындагы закон проекты.

Габдулла Тукай исемендәге Татар Дәүләт филармониясендә Татарстанның халык шагыйре, уникенче чакырылыш Татарстан ССР Югары Советы, беренче-дүртенче чакырылыш  Дәүләт Советы депутаты Роберт Миңнуллинның тууына 75 ел тулуга багышланган искә алу кичәсе булды.

Татарстан Министрлар Кабинеты «Безнең йорт – Татарстан» этнофестивален үткәрү тәртибен раслады. Фестиваль йомгаклары буенча һәр номинациядә бер җиңүче билгеләнәчәк.

Нашли опечатку? Выделите фрагмент и отправьте нажатием Ctrl+Enter