Фидакарьләр (17.11.23)

Башкалабыз Казанда 1 нче тапкыр Бөтенроссия “Туган тел” форумы үтте. 2 көн дәвам иткән форумда илебезнең 30 төбәгеннән 800 татар теле һәм әдәбияты укытучылары, төбәкләрдәге татар иҗтимагый оешмалары вәкилләре катнашты. Алар башкалабыздагы татар мәктәпләреннән тыш, Арча районына бардылар. Түбән Мәтәскә авылындагы Габденнасыр Курсави исемендәге күппрофильле лицеенда һәм Арчаның 6 нчы мәктәбендә булып төрле осталык дәресләрендә катнаштылар.

Икенче көнне ТР Рәисе Рөстәм Нургали улы Миңнеханов катнашында Корстон үзәгендә үткән пленар утырыш алдыннан кунаклар һәм рәсми затлар татар телен үстерүгә, мәгариф, белем һәм тәрбия эшчәнлегенә багышланган күргәзмәне карады. “Татарстан” Дәүләт телерадиокомпаниясе анда үзенең Татарстан Республикасы Рәисе каршындагы Татар телен һәм Татарстанда яшәүче халыклар вәкилләренең туган телләрен саклау һәм үстерү мәсьәләләре комиссиясе ярдәме белән әзерләнә торган “Фидакарьләр” һәм башка проектларын тәкъдим итте. ТР Рәисе Рөстәм Нургали улы Миңнехановка “Мин әтине өйрәтәм” радиосериалының берничә сериясе язылган винил пластинка бүләк ителде.

Бүгенге тапшыруда без форумның пленар утырышында яңгыраган чыгышларга тукталмыйча, делегатларның үзләренә сүз бирергә булдык. Татарстаннан читтә татар теле укытучылары нинди тормыш белән яши? Без алардан татар телен укытуда шартлар һәм мөмкинлекләр турында сораштык.

Нашли опечатку? Выделите фрагмент и отправьте нажатием Ctrl+Enter