Фидакарьләр (03.10.23)

“Фидакарьләр” проекты.

Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез. Студиябезнең чираттагы кунагы — Галиева Зәлифә Габбас кызы. Яр Чаллы шәһәре 29 нчы гимназиясенең татар теле һәм әдәбияты укытучысы.

Зәлифә Габбас кызы тумышы белән Чирмешән районы Әмир авылыннан. Уфа шәһәрендә педагогик белем алганнан соң, хезмәт юлын Башкортстанның Авыргазы районы Солтанморат авылында укытучы буларак башлап җибәрә. Соңрак Яр Чаллы шәһәренә күченәләр. 29 нчы гимназия ачылганнан бирле биредә татар теле һәм әдәбияты дәресләрен алып бара. 1997 елдан бирле гимназиядә “Журналистика” түгәрәген алып бара. Гимназиянең үзендә «Гимназия сулышы» дигән мәктәп газетасы чыгып килә.

Зәлифә Галиева озак еллар Татар теленнән Республикакүләм Бердәм Дәүләт имтиханын, татар әдәбиятыннан Республика олимпиадасы тикшерү комиссиясендә эшли.

Зәлифә Габбас кызының укучылары республикакүләм олимпиадаларда һәрдаим җиңүчеләр. Мәктәптә эшләү барышында Зәлифә габбас кызы Республикакүләм «Иң яхшы укытучы”, “Укытучы-эксперт» конкурсларында җиңеп, грантка ия була. 5 тапкыр ТР Мәгариф һәм фән министрлыгының мактау грамотасы белән бүләкләнә. Россия Федерациясе Мәгариф министрлыгының Мактау грамотасы, «Мәгарифтәге казанышлары өчен” күкрәк билгесе иясе була.

Нашли опечатку? Выделите фрагмент и отправьте нажатием Ctrl+Enter