Фидакарьләр (19.09.23)

Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез. Студиябезнең чираттагы кунагы — Фәхретдинова Гөлшат Мөхәммәт кызы. 1965 елда Арча районы Яңа Кенәр авылында туып-үсә. Туган авылында урта мәктәпне тәмамлагач, товаровед һөнәрен үзләштерә һәм билгеләнү буенча Мәскәүгә юллана. Анда 3 ел эшләгәч, Ерак Көнчыгышка китә. Анда 10 ел яшәгәннән соң, гаиләсе белән Казанга күченеп кайта. Биредә ул икенче һөнәр үзләштерә. 2007 елда Казан Дәүләт педагогика университетын тәмамлый һәм татар теле укытучысы булып эшли башлый. Гөлшат Мөхәммәт кызы Фәхретдинованың хезмәт юлы Казан шәһәре 29 нчы прогимназиясендә башланып китә. Бүген ул Абдулла Алиш исемендәге 20 нче гимназиядә татар теле һәм әдәбияты укытучысы булып эшли.

Татар мәктәпләренең 9 нчы сыйныфлары өчен татар әдәбияты дәреслеге авторларының берсе. Гөлшат Мөхәммәт кызы Фәхретдинова “Сберкласс” платформасында татар әдәбияты буенча цифрлы контентны эшләүчеләр составына керә. 2020-2021 елларда “Татар теле һәм татар әдәбияты” дәресләре буенча методик материаллар эшләүдә катнаша. 2008 елдан Гөлшат Фәхретдинова олимпиада эшләрен тикшерү комиссиясе әгъзасы.  Төбәкара һәм Бөтенроссия конференцияләре җиңүчесе.

2012 елда Гөлшат Фәхретдинова «Безнең иң яхшы укытучы» грантын ота. 2017 елда ТР Мәгариф һәм фән министрлыгының Мактау грамотасы белән бүләкләнә. 2020 елда «Татар телендә белем бирүче педагогик хезмәткәрләргә ярдәм» гранты, «Татарстан Республикасының иң яхшы региональ практикаларын ачыклау буенча I төбәк конкурсы» җиңүчесе.

2021 елда Татарстан Республикасының иң яхшы укытучыларына педагогик эшчәнлектәге казанышлары өчен бирелә торган премия лауреаты.