Фидакарьләр (12.09.23)

Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез. Студиябезнең чираттагы кунагы — Габдинова Зилә Әфтах кызы. Башкортстанның Бакалы районы Катай авылында туып үсә. Химия укытучысы, мәктәп директоры булып эшләгән әтисенең эшен дәвам итеп, укытучы һөнәрен сайларга була. Элек-электән аларның гаиләсендә укытучы һөнәренә ихтирам зур була. Зиләдән кала ике бертуганы да укытучы һөнәрен сайлый.

Башкорт Дәүләт университетын тәмамлаганнан соң хезмәт юлы Уфаның 20 гимназиясендә рус теле һәм әдәбияты укытучысы буларак башлап җибәрә. 1996 нчы елда Казан шәһәренә күченеп, Вахитов районының 116 нчы лицеенда рус телле балаларга  татар теле өйрәтә башлый. Зилә Әфтах кызы әйтүенчә, башта рус балаларына татар теле укыту аның өчен ят нәрсә булган. Ә бүген аннан да ләззәтле, күңеленә  канәгатьлек хисе бирә торган эш юк. “Үз туган телемне башка милләт балаларына укыту һәм шуның нәтиҗәсен күреп сөенү җаныма рәхәтлек бирә. Башка милләт халкын икенче телгә өйрәтү – бик саваплы эш, диләр. Мин бик җаваплы дип тә өстәр идем. Дәресләрдә ике халыкның теле, мәдәнияте арасында бәйләнеш тудыруны максатым итеп куйдым. Үз мәдәниятен яхшы белгәндә генә, укучыларда башка халык мәдәниятенә хөрмәт тәрбияләп була. Киресенчә, чит халык мәдәниятен белү, үзеңнекен тагы да яхшы аңларга ярдәм итә”, — ди Зилә Әфтах кызы Габдинова.

Ул 2016 нчы елда Валерия Николаевна Мещерякова системасына нигезләнгән методик сертификация проектында катнаша һәм профессиональ яктан да, шәхес буларак та камилләшә. Яңа технологияләрнең асылына төшенү өчен күп фәнни хезмәтләр өйрәнә, ачык дәресләрдә, осталык дәресләрендә катнаша. Табышлары белән Республикабызның талантлы укытучылары белән тәҗрибә уртаклаша, алар өчен осталык дәресләре үткәрә, “түгәрәк өстәл”ләрдә, төрле семинарларда чыгышлар ясый.

Зилә Әфтах кызы дәресләрен аңлаешлы һәм кызыклы булсын өчен, уен технологияләрен актив куллана. Дәресләрендә укучыларның татар халкының гореф-гадәтләре, йолаларын, тарихын өйрәнүгә дә зур игътибар бирә. Мондый төр мәгълүматны презентацияләр, видеороликлар ярдәмендә тәкъдим итә. Әзерлек барышында укытучыга күп укырга, эзләнергә, фәнни мәгълүматка мөрәҗәгать итәргә туры килә.  Менә шундый юллар белән Зилә Әфтах кызы үз укучыларының татарча аралашуын  үстерү һәм камилләштерү өчен тынгысыз эш алып бара. Укучылары төрле конкурсларда, конференцияләрдә призлы урыннар алалар, дәрескә кызыксынып, теләп йөриләр.

Зилә Әфтах кызы Габдинованың балаларга белем һәм тәрбия бирүдәге хезмәте югары бәяләнә килә. Ул һөнәри осталык буенча күп кенә конкурслар җиңүчесе. 2022 елда “Ел укытучысы” конкурсы җиңүчесе, шул ук елда «Иң яхшы туган тел һәм әдәбияты укытучысы» Бөтенроссия һөнәри конкурсы финалисты була.

Нашли опечатку? Выделите фрагмент и отправьте нажатием Ctrl+Enter