Фидакарьләр (08.08.23)

“Фидакарьләр” проекты. 27 нче тапшыру.

Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез.

Студиябезнең бүгенге кунагы — Садыкова Зөһрә Зәкәрия кызы. Ул Свердловск шәһәрендә дөньяга килә. Озак та үтми әти-әнисе Мордовия республикасы Ләмберә районы Аксюн авылына күчеп килә. 1975 елда Зөһрә Зәкәрия кызы урта мәктәпне тәмамлый.  “Безгә иң белемле, иң акыллы укытучылар аң-белем бирде, мөстәкыйльлеккә, тормышка өйрәтте. Үзем дә  актив булдым,” — дип искә ала ул бу еллар турында. Мәктәптә уку елларында Зөһрә Садыкова “Призыв” дигән район газетасының ирекле корреспонденты була. Остазлары Зөһрәне укытучы итеп күрәселәре килә, әмма кыз үзе  тикшерүче булу хыялы белән яна. Бу һөнәрне  ул Омск шәһәрендә үзләштерә ала, ләкин әти-әнисе Зөһрәне еракка җибәрергә куркалар. Шуннан ул документларын Саранск педагогик институтының рус теле һәм  әдәбияты бүлегенә тапшыра.

Мордовиянең Ләмберә районы татарларның күпләп яшәгән урыны булса да, районда татар теле укытучылары җитешми. Аксюн авылы мәктәбенең милли җанлы директоры мәгариф министрлыгыннан Казан педагогика институтының татар теле һәм әдәбияты, рус теле һәм әдәбияты бүлегенә юллама алуга ирешә һәм Зөһрә Садыкова документларын Казанга юллый. Рус мохитендә белем һәм тәрбия алган кызга татар телен үзләштерү, әлбәттә, җиңел бирелми. “Әллә кайтып китимме”, — дигән уйлар да килә. Әмма төркемдәшләренең һәм хөрмәтле педагогларның ярдәме кызны канатландыра. Ул үзенә: “Юк, Зөһрә, син булдырырга, укытучыларыңның ышанычын акларга тиеш” дигән максат куя һәм институтны уңышлы тәмамлый. 1980 нче елда төркемдәше Равил Садыйков белән Теләче районы Югары Кибәхуҗа мәктәбенә укытырга юлланалар. Бу авыл халкы һәм укытучылар коллективы яшьләр өчен зур  тормыш мәктәбе була. Бер елдан соң Зөһрә белән Равил Садыковлар гөрләтеп туй үткәрәләр.  

Кибәхуҗа мәктәбендәге эшчәнлеге өчен Зөһрә Садыкова мәгариф министрлыгының Мактау грамотасы белән бүләкләнә.

1987 нче елны Зөһрә һәм Равил Садыйковлар Казанга күченә. Равил Хәсән улы 42 нче, ә Зөһрә Зәкәрия кызы 24 нче рус мәктәпләрендә укыта башлыйлар. Бу елларда татар теле дәресләрен укытуга шартлар юк дәрәҗәсендә була. Шуңа да карамастан, яшь педагоглар җиң сызганып, үҗәтләнеп эшлиләр, укучыларның күңелендә туган телгә мәхәббәт хисләре уяту белән яналар. Шушы елларда Зөһрә Садыйкова беренчеләрдән булып “Әйдәп баручы” укытучы  категориясенә лаек була, 1994 елда “Россия Федерациясе мәктәпләренең мәгариф отличнигы” күкрәк билгесе белән бүләкләнә.

1996 нчы елда Зөһрә Зәкәрия кызын 68 нче татар-рус гимназиясенә милли мәгариф буенча директор урынбасары итеп  билгелиләр. Бу гимназиядә берәмтекләп укучылар җыеп татар сыйныфлары ачу, язучылар, сәнгать эшлеклеләре белән очрашулар үткәрү, әти-әниләр белән тыгыз эшләү өчен Зөһрә Садыкова 2004 нче елда “Татарстан Республикасының атказанган укытучысы” дигән мактаулы исемгә лаек була.

2006 елда Зөһрә Зәкәрия кызын 18 нче татар гимназиясенә вакытлыча директор вазыйфаларын башкаручы  итеп күчерәләр, аннан ул директор урынбасары булып эшли башлый. Шушы елларда гимназия беренчеләрдән булып Россия һәм Татарстан Президентлары грантына ия була. «Россиянең иң яхшы 100 милли мәктәбе” номинациясендә алтын медаль яулый, К.Насыйри премиясен ала. Ләкин иң зур күрсәткеч ул сау-сәламәт, тәртипле, зыялы, милләтебезнең йөзек кашы булырдай балаларыбыз дип саный Зөһрә Садыкова.

Нашли опечатку? Выделите фрагмент и отправьте нажатием Ctrl+Enter