Фидакарьләр (18.07.23)

Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез.

Студиябезнең бүгенге кунагы — Шәгәрәева Алинә Илсур кызы. Тумышы белән тарихи Болгар якларыннан – Татарстан Республикасының Спас районы Урта Йорткүл авылыннан. Туган туфрагы Бөек Болгар җирләре булуы белән горурл

анып яши.

 2007 нче елда, Татар Дәүләт Гуманитар-Педагогика Университетын тәмамлагач, тормышын укытучы һөнәре белән бәйләргә була һәм туган авылына кайтып, үзе белем алган мәктәптә биш елга якын инглиз теле, татар теле һәм әдәбияты укытучысы булып эшли башлый.

Укучылар саны кимү сәбәпле авыл мәктәбе ябылгач, 2012 нче елда Казанга килә һәм Яңа Савин районының 13 татар гимназиясендә татар теле һәм әдәбияты дәресләрен укыта башлый һәм бүгенгә кадәр шушы мәктәптә эшли.  Алинә Илсур кызына хезмәтен ихлас күңелдән ярату һәм һөнәренә тугрылык хас. “Укучыларның фән белән кызыксынуына иң төп ачкыч — укытучы шәхесендә. Иҗади, актив, иң мөһиме үз фәнен белгән һәм яраткан укытучы – фән белән кызыксындыруга иң зур стимул. Яраткан эшеңнән ямь табып, көч, илһам алып яшәүдән дә зуррак бәхет юктыр ул, мөгаен”, — дип саный ул. Татар теле һәм әдәбият белән бәйле төрле чараларда актив катнашу, үзе дә иҗат итү, шигырьләр язу – болар барысы да укытучы Алинә Шәгәрәева һөнәри тормышының бер юнәлеше.

Алинә Илсур кызы Шәгәрәеваның куйган тырыш хезмәте күп кенә мактау грамоталары, рәхмәт хатлары һәм дипломнар белән билгеләнгән. 2023 елда ул “Иң яхшы татар теле һәм әдәбияты” Бөтенроссия конкурсы җиңүчесе.