Кичке концерт (17.07.23)

Хәзер Сезне «Җыр — минем гомерлек юлдашым» циклыннан Балык Бистәсеннән Фирдания Бәдретдинова концертын тыңларга чакырабыз. Башта аның үзе турында берничә сүз. Ул 1964 елда районның Кече Укмас авылында дөньяга килә. Әнисенең җырлаганын һәм радиодан тапшырылган җырларны тыңлап, аларга кушылып җырлап үскән кыз кечкенәдән җырчы булырга хыяллана. Урта мәктәпне тәмамлагач, Алабуга мәдәният көллиятенең режиссура бүлегенә укырга керә. 1988 елда Балык Бистәсе мәдәният йортында эшли башлый. Үз эшенә гашыйк  Фирданиянең иҗаты яңа колач ала. Шул елда оешкан “Камские зори” ансамбле белән чыгышлар ясый башлыйлар. Тиздән Фирдания Бәдретдинованы әлеге ансамбльнең хормейстеры итеп билгелиләр. Ул читтән торып Казан Дәүләт мәдәният институтын тәмамлый. 2005 елда “Сандугач” балалар җыр түгәрәген нигезли. 2008 елда “Өмет” ветераннар фольклор ансамблен оештырып  җитәкли башлый. Ансамбльгә җырга-моңга гашыйк пенсионерлар йөри. Иҗат коллективы Халыкара, Бөтенроссия, республикакүләм уздырылган фольклор фестивальләре, конкурслары лауреаты һәм дипломнаты.

Фирдания ханым моның белән генә чикләнми, 2019 елда туган  телне  саклау, аралашу, Балык Бистәсе районының талантлы шәхесләрен барлау, милли традицияләрне һәм йолаларны өйрәнү һәм аларны үсеп килүче яшь буынга тапшыру максатыннан  “Бистә йолдызлары” клубын оештыра. Әлеге клуб әгъзаләре белән районның төрле мәдәният йортларында “Талантлы син, кеше туганым” дигән әдәби-музыкаль кичәләр уза.

Фирдания Бәдретдинованың үз иҗаты да лаеклы бәясен ала. Ул III  Бөтенсоюз халык иҗаты, “Балкыш” республика  фестивальләре лауреаты. Бөтенроссия  «Татарская эстрада – 89» фестивале, «Голоса Татарстана» конкурсы  Дипломанты. Мәдәният үсешенә керткән өлеше өчен аңа Татарстанның атказанган мәдәният хезмәткәре дигән мактаулы исем бирелә. Хәзер Фирдания Бәдретдинова башкаруында җырлар тыңлыйк.