Фидакарьләр (20.06.23)

“Фидакарьләр” проекты. 20 нче тапшыру.

Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез. Студиябезнең чираттагы кунагы — Шәрәфиева Гүзәл Мансур кызы. 1972 нче елда башкалабыз Казанда дөньяга килә. Иске татар бистәсендәге Садыйк Әхтәмов урамындагы 13 нче мәктәптә урта белем ала. Кечкенәдән укытучы булырга хыяллана.

1991 елда Казандагы 2 нче педагогия училищесының башлангыч сыйныф укытучыларын әзерләү бүлеген тәмамлый. Шул ук елны Казан шәһәренең 30 нчы мәктәбендә (хәзерге вакытта 8 нче гимназия) татар теле укытучысы булып эшли башлый.

2001 елда читтән торып, Казан педагогия институтының татар филологиясе бүлеген тәмамлый. 2007 елдан 2012 елга кадәр мәктәптән китеп башка өлкәдә эшләп карый, әмма мәктәп барыбер үзенә тарта. Шулай итеп, 2012 елда ул кабат 8 нче гимназиягә әйләнеп кайта һәм 2022 елга кадәр милли мәсьәләләр буенча директор урынбасары вазифасын башкара.

Гүзәл Мансур кызы Шәрәфиева бүген югары квалификацион категорияле туган тел укытучысы. Мәгариф һәм балаларга белем бирү өлкәсендә ирешелгән уңышлары өчен Татарстан Республикасының мәгариф һәм фән министрлыгының мактау грамотасына лаек була.

Нәселләрендә 10 укытучы бар. Кызы – Шәрәфиева Рүзилә Рамил кызы шул ук гимназиядә эшли. Быел Россия Федерациясе Президенты Владимир Путин тарафыннан игълан ителгән “Педагог һәм остаз елы” уңаеннан алар гаиләләре белән “Без тарихта эзлебез” дигән шәҗарә фестивалендә катнашып, дипломга лаек булалар. Гүзәл Мансур кызы Шәрәфиева сайлаган юлын эш итеп кенә түгел, ә яшәү мәгънәсе дип саный. 

Нашли опечатку? Выделите фрагмент и отправьте нажатием Ctrl+Enter