Фидакарьләр (23.05.23)

“Фидакарьләр” проекты. 16 нчы тапшыру.

Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез. Студиябезнең чираттагы кунагы — Гобәйдуллина Зөлфия Равил кызы. Ул тумышы белән Кукмара районы Зур Сәрдек авылыннан. 1989 елда урта мәктәпне тәмамлый һәм Казан Дәүләт университетының татар филологиясе, тарихы һәм шәрыкъ телләре факультетына укырга керә. Хезмәт юлын 1993 елда Казан шәһәре 9 нчы гимназиясендә татар теле һәм әдәбияты укытучысы вазифасында башлап җибәрә. Һәм бүген дә шул ук гимназиядә эшли. 25 ел дәвамында гимназиянең татар теле һәм әдәбияты укытучыларының методик берләшмәсе җитәкчесе.

Зөлфия Равил кызы Гобәйдуллина һөнәри конкурсларның актив катнашучысы: 2000 нче һәм 2017 елда “Ел укытучысы”, 2017 һәм 2022 елда “Туган тел – осталык дәресе” ярышларының Мәскәү районы этабы җиңүчесе, 2018 елда “Укытучы – мастер” гранты иясе.

Зөлфия Равил кызы укучыларыны да фәнни эзләнүләргә һәм иҗатка рухландыра, алар остазлары белән беррәттән, фәнни-гамәли конференцияләрдә актив катнашалар, иҗади конкурсларда призлы урыннар яулыйлар. Фәнни-методик эзләнү йомгаклары республика, Россия күләмендә һәм халыкара дәрәҗәдәге җыентыкларда урын ала.

Яшь буынга белем һәм тәрбия бирүгә керткән зур өлеше өчен Гобәйдуллина Зөлфия Равил кызы 2004 елда Татарстан Республикасы Мәгариф министрлыгының, 2006 елда Казан шәһәре Мәгариф идарәсенең мактау кәгазьләре, 2021 елда ТР Мәгариф һәм Фән министрлыгының “Мәгарифтәге казанышлары өчен” күкрәк билгесе белән бүләкләнгән.

Нашли опечатку? Выделите фрагмент и отправьте нажатием Ctrl+Enter