Фидакарьләр (12.05.23)

“Фидакарьләр” проекты.

Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез. Студиябезнең чираттагы кунагы  — Нурмиева Гөлгенә Вазыйх кызы, Саба районы Миңгәр авылында дөньяга килә. Әнисе — Вәракыя Габдулла кызы районның иң алдынгы укытучыларыннан була. Гөлгенә дә әнисе юлыннан китә. Башта Арча педагогия училещесын, аннары Казан Дәүләт университетының филология факультетын тәмамлый. Хезмәт юлын  1991 нче елда туган авылында башлап җибәрә. Аннары язмыш аны  Казан белән бәйли. 1997 елдан бүгенгә кадәр Казан шәһәре Вахитов районының Һади Такташ исемендәге 27 нче татар гимназиясендә балаларга татар теле һәм әдәбият дәресләрен укыта.   

Укучылары ел саен республика күләмендәге олимпиадаларда,  ана теленнән Бөтенроссия һәм Халыкара олимпиадаларда җиңүләр яулыйлар.  2016 нчы елда укучысы Зилә Мөбәрәкшина татар теленнән үткәрелгән Халыкара олимпиаданың Гран-при иясе була. Хәзер ул Республиканың алдынгы мәгълүмат агентлыгында журналист булып эшли.

Гөлгенә Вазыйх кызы Ана теле укытучыларының “Ана теле” мастер-класс бәйгесенең Гран-при иясе.  Россия һәм Татарстанның иң яхшы укытучыларына бирелә торган премияләр конкурсы җиңүчесе. Татар телендә белем бирүче укытучыларның  проектлар бәйгесе җиңүчесе.

Нашли опечатку? Выделите фрагмент и отправьте нажатием Ctrl+Enter