Пар канатлар (02.05.23)

Бәйрәм алды көннәрендә Татарстанның халык артисты, Татарстан радиосында 50 ел эшләгән танылган шәхес Рафаэль Ильясовны искә алу көннәре билгеләп үтелде. Татарстан дәүләт радиосы коллективы халкыбызның күренекле шәхесләре, фидакарь хезмәте белән Татарстанны бөтен дөньяга таныткан егет-кызлары турындагы хатирәләрне кадерләп саклый, алар турындагы мәгълүматны тыңлаучыларга көне-сәгате белән түкми-чәчми, гадел һәм дөрес иттереп җиткерә. 96 ел эчендә Татарстан радиосында бик күп күренекле язучы һәм шагыйрьләр, җырчы һәм композиторлар “тормыш мәктәбе” узган. Бүген дә шулай. Коллективыбыз ветеран-коллегаларыбыз турындагы истәлекләрне кадерләп саклый.

Кеше китә, җыры кала

Сагынып җырлар өчен.

Халкыбызга сагынып җырлау өчен үзе башкарган моңлы җырларын гына түгел, күпсанлы сәнгать осталары зәвык белән башкарган җырларны да калдырып, Татарстан радиосының музыкаль тапшырулар редакциясен 50 ел дәвамында җитәкләгән популяр җырчы, Татарстанның халык артисты Рафаэль Ильясов 2020 нче елның декабрь аенда арабыздан мәңгелеккә китеп барды. Үзе китте, иҗаты калды. Шушы көннәрдә аның тууына 84 ел тулды. Тапшыру хезмәттәшебезнең якты истәлегенә багышлана.

Нашли опечатку? Выделите фрагмент и отправьте нажатием Ctrl+Enter