Фидакарьләр (31.03.23)

Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез. Студиябезнең чираттагы кунагы — Арсланова Әнисә Дәүли кызы. Ул 1966 елның 10 нчы сентябрендә Кукмара районы Каеннсар авылында дөньяга килә. Үз авылында башлангыч мәктәпне тәмамлаганнан соң, укуын күршедәге Байлангар авылында дәвам итә. Әнисә Дәүли кызы бик бәләкәйдән укытучы булырга хыяллана. Аларның гаиләсендә мәктәпкә, укуга, укытучыларга хөрмәт зур була. 8 нче сыйныфны тәмамлаганнан соң, 1982 елда, Арча педагогия училищесына юл тота. 1986 елда педучилищены тәмамлагач, юллама белән Чистай районына укытырга җибәрелә. Шул ук елны читтән торып, Педагогия институтының татар теле һәм әдәбияты бүлегенә укырга керә.

Чистай районында 9 ел эшләгәннән соң, Әнисә Арсланова гаиләсе Казанга күченә. Башкалабызда хезмәт юлын Идел буе районы 150 нче мәктәптә дәвам итә. Төрле мәктәпләрдә татар теле һәм әдәбияты укытучысы булып эшли. Бүген Казан шәһәре Идел буе районы 73 нче урта мәктәбендә татар теле һәм әдәбияты укыта. 12 ел милли мәгариф эшләре буенча директор урынбасары булып эшли. Күп еллар татар теле һәм әдәбияты укытучыларының район методик берләшмә җитәкчесе булып эшли һәм мәктәптә татар театр түгәрәген җитәкли. 2022 елда Туган телләрне саклау буенча Дәүләт программасы конкурсында катнашып, “Театр – могҗизалар иле” проект эше белән җиңеп чыга.     

Мәгариф һәм тәрбия эшендә ирешелгән уңышлары өчен Арсланова Әнисә Дәүли кызы күп кенә мактау грамоталары, рәхмәт хатлары белән бүләкләнә. Ә 2020 елда Мәгариф өлкәсендәге казанышлары өчен күкрәк билгесенә ия була.

Нашли опечатку? Выделите фрагмент и отправьте нажатием Ctrl+Enter