Яңалыклар (29.03.23)

Иртәнге чыгарылыш.

• 1 апрельдән Татарстанда санитар-экология икеайлыгы башлана. Кыш көне җыелган чүп-чардан җыештыруга республиканың барлык халкы чакырыла.
• Татарстан мәктәпләрендә иртәгә балаларны беренче сыйныфларга кабул итү кампаниясе башлана. Быел 53 меңнән артык бала беренче сыйныфка барыр дип көтелә.
• 20 апрельдә, Ураза гаете алдыннан, Казан телевизион манарасын төрле төстәге якты нурлар бизәячәк. Татар милли бизәкләре белән утлы шоу бәйрәм мохитен тудырып, шәһәр халкына гомумкешелек кыйммәтләре турында искә төшереп торачак.

Көндезге чыгарылыш.

• Татарстан хөкүмәте 2030 елга кадәр кирәкле һөнәрләр исемлеген раслады. Премьер-министр Алексей Песошин имзалаган документта икътисад үсешенең өстенлекле юнәлешләренә туры килгән һөнәрләр күрсәтелгән.
• “Татар сүзе” II Халыкара нәфис сүз телевизион бәйгесенең җиңүчеләре билгеле. Быел конкурсны Татарстан Рәисе каршындагы Татар телен һәм Татарстанда яшәүче халыклар вәкилләренең туган телләрен саклау, үстерү мәсьәләләре комиссиясе белән берлектә, «Яңа Гасыр» телерадиокомпаниясе оештырды.
• Бөтендөнья татар конгрессы 1 апрельдән 18 майга кадәр «Интегральләштерелгән татар теле дәресенең методик кулланмалары» дигән Бөтенроссия бәйгесен уздыра.

Кичке чыгарылышлар.

• Казанга бер көнлек эш cәфәре белән Россия Федерациясе Хәрби-сәнәгать комиссиясе рәисенең беренче урынбасары, Россия Федерациясе Иминлек Советы Рәисе урынбасары Дмитрий Медведев килде.
• Башкалабызның Юдино станциясеннән Дәрбишләр станциясенә кадәр яңа тимер юл төзү планы әзерләнгән.
• 5 нче апрельдә Казанда яшәүчеләр һәм кунаклар Татарстан Милли музеена һәм аның филиалларына бушлай керә алачак.

• Казанда бер көнлек эш сәфәре белән РФ Иминлек советы рәисе урынбасары Дмитрий Медведев булды.
• Дәүләт Советында «Бердәм Россия» партиясенең Татарстандагы депутат берләшмәләренең Республика Координация советының гомуми җыелышы узды.
• Россиядә 1 апрельдән социаль пенсияләрне өстәмә рәвештә 3,3 процентка индексацияләячәкләр.

Нашли опечатку? Выделите фрагмент и отправьте нажатием Ctrl+Enter