Яңалыклар (22.03.23)

Иртәнге чыгарылыш.

• Татарстан мөселманнары Диния нәзарәте XI Республикакүләм ифтарына волонтерлар җыю турында игълан итте. Ифтар кунакларын каршы алу, җәмәгать намазын укуны оештыру, ашамлыкларны өләшү һәм ахырдан өстәлләрне җыештыру өчен 16 яшьтән өлкәнрәк 700 волонтер җәлеп итү күздә тотыла.
  22 – 26 март көннәрендә Белоруссиядә «БелЭкспо» Күргәзмә үзәгендә XXХ Минск Халыкара китап күргәзмә-ярминкәсе уза.
• «Россия китаплары» стендындагы 14 нәшрият китаплары арасында Татарстан китап нәшрияте басмаларын да күрергә мөмкин булачак.
• 23 мартта республика кан үзәгендә язгы донорлык акциясе оештырыла. Башкалада яшәүче, 18 яшьтән өлкәнрәк кешеләр кан бирә ала. Башта кан үзәгендә теркәлергә кирәк. Донорларны Җңү проспекты, 85 йорт адресы буенча иртәнге сәгать сигездән уникегә кадәр көтәләр.

Көндезге чыгарылыш.

• Быел Татарстанда информатика, җәмгыять белеме, тарих һәм әдәбият буенча Бердәм Дәүләт имтиханнарын тапшыруны сайлаган унберенче сыйныф укучылары саны арткан. Бу хакта Татарстан Хөкүмәте Йортында узган брифингта мәгариф һәм фән министры Илсур Һадиуллин хәбәр итте.
• Рамазан ае алдыннан Татарстан мөселманнары Диния нәзарәте сайтының «Файдалы мәгълүмат» бүлегендә «Рамазан-2023: төп сораулар» сәхифәсе эшли башлады. Ул сайттан файдаланучыларга изге айны үткәрү, ураза тоту, башка дини йолаларның тәртипләренә кагылышлы иң киң таралган сорауларга кирәкле һәм нигезле җаваплар табу мөмкинлеген бирә.
• Буа районының Яңа Чәчкап урта мәктәбендә шагыйрь Әхмәт Рәшит исемендәге «Кояшлы ил» VII республикакүләм фәнни-гамәли конференция узды. Укучылар шигырь һәм әдәби әсәрдән өзек сөйләү номинацияләрендә белемнәрен күрсәтте. «Язучылар иҗатында туган илгә мәхәббәт» һәм «Сәнгатьтә укытучы образы» фәнни секцияләре дә эшләде.

Кичке чыгарылышлар.

• Татарстан Рәисе Рөстәм Миңнеханов хөкүмәт йортында Россиянең өзлексез һөнәр бирү медицина академиясе ректоры Дмитрий Сычев белән очрашты.
• Татарстанда Украинада махсус хәрби операциядә катнашучыларның һәм махсус операция зонасында һәлак булганнарның гаиләләренә ярдәм итүнең яңа чарасы кертелде. Мондый гаиләләрдәге балалар бер ата-ана белән бергә, республика мәдәният учреждениеләрендәге чараларга бушлай йөри ала.
• 23 мартта Казанда вакансияләр ярминкәсе оештырыла. Шәһәр халкына район предприятиеләрендә буш эш урыннары һәм вакантлы вазыйфалар турында мәгълүматлар биреләчәк.

• Россия Президенты Владимир Путин Галиәскар Камал исемендәге Татар дәүләт Академия театры режиссеры Айдар Җаббаровка яшь мәдәният эшлеклеләренә билгеләнгән премияне тапшырды. Тантана Мәскәү Кремлендә узды.
• Республикада күренекле галим, этнограф һәм мәгърифәтче Каюм Насыйриның ике гасырлык юбилеен бәйрәм итүгә багышланган чаралар планы әзерләнәчәк. Татарстан Рәисе Рөстәм Миңнеханов шул хактагы документны имзалады.
• 3 нче һәм 4 нче апрельдә Татарстан Милли музеенда «Бүләк итү көннәре» узачак. Теләгән һәркем музейга нинди дә булса әйбер яки тулы бер коллекция бүләк итә ала.

Нашли опечатку? Выделите фрагмент и отправьте нажатием Ctrl+Enter