Фидакарьләр (21.03.23)

5 нче тапшыру.

Гомерләрен татар теле һәм әдәбиятын, башка фәннәрне татар телендә укытуга багышлаган, укучылары күңелендә туган телгә мәхәббәт тәрбияләүче мөхтәрәм укытучылар һәм бакча тәрбиячеләре турында сөйләвебезне дәвам иттерәбез. Студиябезнең чираттагы кунагы  — Шакирова Гөлия Әскать кызы. 1974 елның 5 нче маенда Татарстанның Буа районы Килдураз авылында дөньяга килә. Үз авылларында урта мәктәпне тәмамлап, 1 ел күмәк хуҗалыкта эшләгәннән соң, Тәтеш педагогия училищесена укырга керә. Аны тәмамлагач, Казанга татар теле укытырга җибәрелә. Казанның төрле мәктәп һәм балалар бакчаларында эшли. Читтән торып, Казан Дәүләт педагогия университетының татар теле һәм әдәбияты факультетын тәмамлый. 2004 елдан бүгенгә кадәр Шиһабетдин Мәрҗани исемендәге 2 нче татар гимназиясендә татар теле һәм әдәбияты укытучысы булып эшли.

Мәгариф өлкәсендә ирешелгән уңышлары Казан шәһәре Башкарма комитетының Мәгариф идарәсе, ТР Мәгариф һәм фән министрылыгының рәхмәт хатлары, мактау грамоталары белән билгеләп үтелә. 2014 елда «Иң яхшы татар әдәбияты дәресе» интернет-конкурсы дипломанты. 2016 елда «Мәгарифтә казанышлары өчен» күкрәк билгесе белән бүләкләнә.

Нашли опечатку? Выделите фрагмент и отправьте нажатием Ctrl+Enter