Яңалыклар (21.03.23)

Иртәнге чыгарылыш.

• Татарстан Рәисе Төркия Республикасының Казандагы Генераль консулы Исмәт Эрикан белән очрашты.
• Узган шимбәдә Казанда узган беренче язгы авыл хуҗалыгы ярминкәсендә 54 млн сумлык продукция сатылган.
• Изге Рамазан ае дәвамында Казан мәчетләрендә көн саен ифтарлар узачак.

Көндезге чыгарылыш.

• Татарстан Хөкүмәте Йортында Республика Инвестиция советы утырышы булды. Утырышны Татарстан Рәисе Рөстәм Миңнеханов үткәрде, видео элемтә режимында муниципаль районнар да тоташтырылды. Утырышта Татарстан Премьер-министры Алексей Песошин катнашты.
• Бүген төрки халыклар язның күркәм бәйрәме — Нәүрүзне билгеләп үтә. Төркиянең Тышкы эшләр министры Мәүлет Чавушоглу Татарстан Рәисе Рөстәм Миңнехановка Нәүрүз бәйрәме белән котлау юллады.
• Татарстан Дәүләт Советы Рәисе, Халыкара хезмәттәшлек проблемалары буенча Россия Закон чыгаручылар советы комиссиясе рәисе, Азия һәм Африка халыклары белән теләктәшлек һәм хезмәттәшлек буенча Россия комитетының попечительләр советы әгъзасы Фәрит Мөхәммәтшин Мәскәүдә булды. Ул биредә «Россия – Африка: күп полярлы дөньяда» дигән икенче халыкара парламент конференциясенең пленар утырышында катнашты.

Кичке чыгарылышлар.

• Татарстан Рәисе Рөстәм Миңнеханов республикада яшәүчеләрне Нәүрүз бәйрәме белән котлады. Ул билгеләп үткәнчә, бу традиция күпмилләтле Татарстанда ел саен республиканың төрле почмакларыннан меңләгән кешене берләштерә.
• Галиәсгар Камал исемендәге Татар дәүләт Академия театры режиссеры Айдар Җаббаров Россия Президентының яшь мәдәният әһелләренә бирелә торган премиясенә лаек булды.
• Татарстаннан мобилизацияләнүчеләрнең гаиләләре бала туу һәм тәрбияләүгә бәйле ай саен түләнә торган пособие ала. 2023 елда пособие запастан чакырылган 15 хәрбинең йөкле хатынына һәм мобилизациягә чакырылганнардан 400дән артык гаиләгә, барысы 677 балага билгеләнгән.

• Россия Федерациясенең Куркынычсызлык Советы секретаре Николай Патрушев Ульяновскийда Идел буенда иминлекне тәэмин итүнең актуаль мәсьәләләренә багышланган киңәшмә үткәрде. Анда Россия Президентының Идел буе Федераль округындагы тулы Вәкаләтле вәкиле Игорь Комаров, федераль министрлыклар һәм ведомстволар вәкилләре, Идел буе округына кергән төбәкләр җитәкчеләре, шул исәптән Татарстан Рәисе Рөстәм Миңнеханов катнашты.
• Иннополиста ил Президентының “Россия – мөмкинлекләр иле” палтформасының “Уенны башла” проектының беренче сезоны финалы башланды. 59 төбәктән килгән 297 кеше дүрт көн дәвамында бизнес өчен төрле уеннарда катнашып, тиешле карарларны әзерлиләр, үз проектларын экспертлар алдында яклыйлар.
• Бөтендөнья театр көне уңаеннан Казан дәүләт мәдәният институтында театр атналыгы башланды. Атна дәвамында уку йортында осталык дәресләре үткәрелә, театр сәнгате белгечлеге буенча белем алучыларның чыгарылыш һәм курс спектакльләре күрсәтелә, түгәрәк өстәл янындңа очрашулар оештырыла.

Нашли опечатку? Выделите фрагмент и отправьте нажатием Ctrl+Enter